容祖兒榮升容祖「母」，於紅館個唱上挺着巨肚宣布懷胎三月，但原來只是與歌迷開玩笑。過完戲「孕」的祖兒再轉玩性感，除上演半裸「星球」大戰外，又以超Deep V裙與蔡卓妍（阿Sa）抱抱，相信在山頂位俯瞰女友的劉浩龍睇到一額汗！

祖兒穿上長裙晒V兼露長腿，認真Sexy！

祖兒於台上與舞蹈員落力載歌載舞。

挺着巨肚的祖兒表示懷孕三個月，令全場嘩然！

楊受成與太太陸小曼及阿Sa亦有捧場。

劉浩龍（右）穿上印有「JY」的外套支持女友，阿姐亦有捧場。

樂壇天后容祖兒一共15場的跨年個唱《ageas富通保險1314容祖兒演唱會》前晚開鑼，最令人驚喜的是，祖兒被巨型白布包圍下宣布已為「人母」：「我有個秘密要同大家分享，哎吔！佢又踢我啦！其實我有咗三個月，大家想唔想摸吓？」正當人人以為祖兒與劉浩龍（師兄）成功造人之際，祖兒挺着假巨肚、穿上孕婦裙現身說：「想試吓有生之年成為喜劇演員，同大家開吓玩笑，呢個環節係歌頌母親。」

過完戲「孕」後的祖兒即回復S身形，換上透視旗袍等性感戰衣與「股」惑男舞蹈員跳勁舞。

「半裸」誘惑

臨近尾聲更以一套肉色星星Bra Top登場，從背面驟眼看十足半裸，大玩「星球」誘惑。全晚可算愈夜愈有睇頭，Encore環節上，祖兒穿上一襲桃紅色Deep V裙與好姊妹阿Sa及關智斌握手抱抱，並叮囑粉絲：「大家小心啲，我件衫得一粒鈕。」

相信最擔心祖兒被睇蝕的一定是在山頂位的師兄，據知師兄前晚猶如冇掩雞「龍」，以男主人家身份在後台自出自入。騷後祖兒亦難掩甜蜜說：「佢（師兄）坐喺最高，話要用唔同角度睇。（幾時真大肚？）係都過咗15場先講。」

談簡單戀愛

對於有報道指她與男友因錢銀轇轕而陷入冷戰？祖兒Sweet到爆發表愛的宣言：「每次開騷都有呢啲新聞，我哋冇任何錢銀轇轕，只係一場簡單戀愛。」此外，劉浩龍穿上印有「JY」Logo的外套秘密捧女友場，並於微博上大讚祖兒的演出Very Good！實行粉碎冷戰傳聞。