官恩娜：畀人包有乜咁開心?

官恩娜（Ella）與外籍醫生男友拍拖4年，感情穩定，曾經拍過7次拖的她，在感情路上學懂去錫及遷就對方，也要給對方空間。回想起初戀時候的她，跟現在的她完全不同，感覺似兩個人，她說：「呢刻我覺得自己唔錯，如果仲要去變，可能係耐性囉！因為有時一忙我就好難細心、專心去聆聽，忽略咗一啲情趣。」

「冇咩嘢做就病！」

自嘲是工作狂的Ella，腦海中無時無刻都想着工作，這種慣常已是她的生活模式，工作令她的時間變得實在，也帶來滿足感，她不愛游手好閒：「冇咩嘢做就病，漫無目的嘅人生好虛耗。」不過，她明白工作跟家庭同樣重要，要學識平衡。

Ella分享一宗「八卦」趣聞，有次她演出一個節目，巧遇行內一個女仔，大家埋位前滔滔不絕交談，對方突然開心地跟她說：「有個師傅話頭髮軟嘅女仔，好似我咁可以靠男人，頭髮硬就靠唔到。」她形容是「傻了眼」：「依家咩年代，點解咁樣諗？呢個年代要靠男人得兩個原因，一係你冇能力，一係你畀人包，有乜咁開心？」她否認是女權主義，本身也非大女人，但覺得靠男人是無能的事：「乜都唔做要個男人養，我覺得好Old School，唔知點解佢喺大庭廣眾咁樣、好雀躍講咗呢句說話。」

諗住靠男人唔正路

Ella明白每個人價值觀不同，可能對方在工作上找不到存在點，但她不喜歡那種依賴、依附，猶如寄生蟲的感覺，她相信一段關係要互相平衡、扶持，大家要一齊成長，互相照顧，她說：「我仲係偏向靠自己多啲，唔想做一個無能嘅人，有愛錫自己的男人當然好，如果你思想諗住靠男人，好似唔係好正路！」

「姣妹」學識保護自己

初出道時的Ella給人感覺姣，當大家對她開始了解，便知她的個性非常爽朗，讀書時非常男仔頭，更試過剷青，跟大她一歲的哥哥打架打到大，Ella笑說：「初出道時唔識保護自己，嗰時唔明中國人社會，可能自己喺外國讀書大，大家係朋友就算男仔都會攬吓，唔會有咩顧忌，依家明白到喺香港人社會，咁樣做好易令人誤會，畀人影到相就會大做文章，會話你又姣人、溝人。」現在她終於學懂保護自己，即使再相熟的男藝人朋友，也會懂得小心處理。

愛情事業兩得意的Ella，承認目前心境幾平衡，事業上她希望有更多代表作，更希望有機會踏上舞台舉行個人演唱會，她說：「我真係鍾意唱歌，可以鎖自己喺屋企唱爆咪，有人欣賞自己冇人會唔鍾意，唱歌都係希望感動人，得到大家共鳴，希望幾年內能圓開個唱夢！」

於2004年入行的Ella表示時間過得很快，知道要把握人生，抓實每個機會，她說：「做人都要有信念，呢行亦要講耐力，因為太多變數，可能好多嘢阻礙你向前行，你自己要有信念行過去，我知道好多人易放棄、冇堅持，我記得有個前輩曾經講過，呢行要鬥耐力，因為冇人知幾時機會到，日日都有奇怪事發生，如果你呢個遊戲都唔玩，你棄權，你點等到機會？你唔喺個遊戲裏面就更加冇機會，但你一日留喺個戰場，你仲有機會，就好似我喺《巨聲》唱歌，係陪參賽者，隻歌又唔係我揀，完全冇諗過成為焦點，我覺得好驚喜。」

不愛夜蒲愛執屋

超級反吸煙的Ella連酒也少飲，甚至不愛夜蒲，自封家務紅牌阿姐的她笑說：「我真係宅女，我窮盡一生都係做收納，我好鍾意整齊，如果我唔係做呢行，我會做家務助理，我覺得我係紅牌阿姐，如果你請到我，你就真係好幸福！」她形容自己愛整潔的程度去到一塵不染，有少少變態，平日有時間她最愛執屋，會將家裏的衣服、鞋履、擺設全搬出來，扭盡六壬重新執過，她笑說：「有時朋友、屋企人來玩，翻轉咗間屋，我覺得執屋係一種樂趣，吸塵又鍾意，細細個我就學識『省』廁所、浴缸，好叻o架！」但她覺得潔癖個性並非遺傳自父母，相信是遺傳自婆婆，因為婆婆的房間跟她一樣十分整齊乾淨。

後記：「我真係黐線o架！」

訪問期間，Ella講到最拿手的執屋即滔滔不絕，更教筆者用除塵紙掃地，方便快捷，還教路一張除塵紙掃完一邊，可以反轉去用另一邊，既慳錢又好用，她謂平日見到少少污糟黑點，一定要捽走為止，否則誓不罷休，難怪連她自己都忍不住大笑說：「我真係黐線o架！」