楊千嬅與丁子高於2009年12月20日拉埋天窗，前日已是結婚第四個年頭，丁生表示二人相識剛好踏入第七年，不過沒有七年之癢，因為兩人有聊不完的話題，更在微博對老婆冧爆留言：「永遠愛你七百年！」

楊千嬅與丁子高前後相處七年，五年前在美國註冊，結婚四年兩口子依然恩愛如昔，前日是結婚周年紀念，丁氏夫婦特別到酒店頂樓的海景餐廳撐枱腳，丁生說：「其實一年有三個日子一定要慶祝，就係五月二十八相識紀念，八月十一註冊紀念，同埋十二月二十嘅結婚紀念，諗番四年前結婚，其實都有好多回憶，因為我哋飛咗去法國影婚紗相，前前後後都籌備咗八個月時間！」問到可有七年之癢？他笑說：「我都想癢呀，因為跟千嬅同一個職業，所以有太多話題，大家好似好朋友咁，有傾唔完嘅話題唔會悶，依家仲有埋個仔，話題就更加多，兩個人一齊最怕就係冇嘢講，而且今年我哋都好忙唔係成日見，一有時間聚埋就雞啄唔斷！」

相處之道貴乎體諒

丁子高又謂相處之道是要體諒對方，他續說：「永遠要企喺對方立場睇，佢忙時唔好騷擾佢，同埋要有適量嘅空間，要有自己朋友圈子！」至於可再有造人大計？他表示要看天意，不過若農曆新年前都沒有「聲氣」，那大家就繼續努力工作吧！