周秀娜師妹盧頌之（DaDa）及「大隻男」趙勁皓（King）早前大方承認戀情，兩人更不避嫌到商場拍拖，實行一杯飲品兩份飲。情到濃時，King輕輕親吻女友的額頭，DaDa則輕撫男友臉頰，雖然全程慳住使，但依然Sweet到爆！

DaDa及King行街只看不買，夠晒慳家！

情到濃時，DaDa及King當眾又攬又錫，認真冤氣。

DaDa身為貼心女友，當然要餵男友食嘢！

靚模盧頌之與同門「大隻男」趙勁皓早前合作電影《爆3俏嬌娃》，日對夜對終擦出愛火花，拍拖時更拖手做「連體嬰」！他們早前被拍得在西九龍中心閒逛，兩人先在溜冰場拖着手睇別人溜冰，其後再到小型遊樂園玩扑傻瓜及夾公仔，童心未泯。King未知是否經常出招冧女而熟能生巧，各項遊戲均得心應手，反觀DaDa扑傻瓜時屢次失手，要男友捉實手仔教路！夾公仔時，King成功得手，一對小情侶即興奮互望，King更情不自禁輕撫女友髮尾並親吻其額頭，DaDa則撫摸男友的臉頰，認真Sweet！

夠上進奪芳心

其後，他們到美食廣場吃下午茶，兩人只叫了一客上海餃子及一杯台灣特飲。期間，King主動餵女友食餃子，兩人又輪流喝飲品，更不時情深地看着對方，熱戀中的情侶認真冤氣！吃飽後，兩人到商場閒逛，但全程只看不買，逛了數圈仍未有斬獲。他們拍拖花費不足100元，可見DaDa相當錫住男友的荷包！

DaDa受訪時大方承認戀情，並大讚愛郎：「開頭都覺得佢花弗，但合作拍戲後發現佢有上進心，每件事都好畀心機。（點撻着？）我哋本身識咗一段時間，好坦白講出內心感覺，加上佢做咗啲冧嘢，就好自然咁一齊咗。（鍾意佢夠大隻？）最緊要相處到，大隻係Bonus（額外獎勵）。」