孖妹組合AOA今個聖誕忙搵銀，她們難忘小時候被聖誕老人嚇到喊，但仍想反串聖誕老人應節，而事業心重的鄒文正則恨聖誕開工。

鄒文正揚言恨聖誕開工，更會送AOA的新碟給親友，非常識做。

孖妹組合AOA自爆兩歲時被聖誕老人嚇到喪喊，認真可憐！

聖誕節本是普天同慶大日子，不過卻是藝人搵銀之日，AOA與鄒文正今年齊齊在工作中度過，AOA更要Lady GaGa上身，以全新造型見人。問到最難忘的聖誕節，AOA即異口同聲自爆兩歲時曾被聖誕老人嚇親：「嗰陣第一次見聖誕老人，覺得佢好恐怖，我哋兩個係咁喊，連聖誕老人送禮物畀我哋都唔敢收！」雖然如此，不過她們未有心存陰影，反而有意反串做聖誕老人應節：「聖誕老人咁肥，我哋要兩個扮一個。」

買新碟送禮

至於事業心重的鄒文正，直言恨在聖誕節開工：「今年會喺工作中過聖誕，不過都希望Keep住多啲工作！」問到今年會送甚麼聖誕禮物給親友？他即賣口乖說：「為咗支持AOA，我會買佢哋隻新碟送畀親朋戚友。（聖誕有咩祝福？）我好專一，全年送同一個祝福，希望所有人都身體健康、心想事成。」