聖誕節將至，朱晨麗、林夏薇及謝東閔早前相約到商場睇燈飾兼影相，他們看見卡通人物時即撇下藝人身份，除了與市民齊齊逼外，又像小朋友般爭相與公仔合照，名副其實是大細路！三人對聖誕節都有不同感覺，於內地長大的阿朱透露因身處內地未能感受節日氣氛，後來到香港讀書才慢慢感受到濃厚節日氣氛。不過，她自言10多歲便加入專業舞蹈團，每逢聖誕均特別忙碌，令她未能外出歡度佳節：「呢段時間都會準備劇目，日排夜排好辛苦，試過連續4年都係咁過聖誕，最後一日先慶祝，但都只係圍埋食嘢。人哋喺歡笑聲中過節，我哋就喺工作中度過，但完場時聽到觀眾嘅掌聲係我哋最大嘅鼓勵。」

林夏薇（右）及朱晨麗衝上前與聖誕樹合照，爭住做聖誕女郎。

至於夏薇則透露約8歲時於尖沙咀觀賞聖誕燈飾，期間與父母失散：「覺得父母係會搵我就去個中心點度撞，點知又真係見到，依家諗番真係好好彩！（信有聖誕老人？）父母就係，但要靠努力去換，例如幫媽咪按摩，第二日就會有禮物放喺對聖誕襪度！」而謝東閔則表示學校有10多天假期，讓他與同學瘋狂玩樂，令他最為興奮，又表示於外國讀書時會與友人飲酒慶祝。