靚靚護夫開火
金像影后袁詠儀（靚靚）與老公「Cool魔」張智霖（Chilam）打賭，因貼中老公輸視帝而獲贈鑽石手鈪，她隨即在微博「多謝」無綫賜鈪的言論，竟遭網友鬧爆兩夫婦是輸唔起！靚靚護夫情切，短短個多小時內連環向八名網友反擊，事後更着網友︰「唔好無限放大！」
靚靚強調獲老公送鑽鈪，真心高興！
【遮光連環圖】（左起）徐子珊、楊怡、田蕊妮、鍾嘉欣
子珊與楊怡於台上互相「檢視」性感晚裝，當發現阿田疑似走位，即哄埋幫手整理免走光。
誰說爭獎就會不和？眾花旦齊心幫阿田「遮光」，嘉欣更負責擋在前方睇水。
張智霖日前於無綫台慶頒獎禮大熱倒灶失落視帝，雖然仍奪「最受歡迎電視男角色」攞尾彩，但於台上一番「義氣仔女」論及一句「係咪TVB唔鍾意我？」即被指似乎不滿賽果。而做唔成視帝的Chilam為兌現與太太袁詠儀的承諾，乖乖將價值6位數的鑽石手鈪送上，靚靚收禮後在微博留言「多謝」無綫，句句有骨。
雖然不少網友留言安慰，但有網友認為二人是「輸唔起」！昨晨有數名網友接連留言攻擊，先是踩Chilam︰「很明顯的輸不起，跟你老婆一個樣。還是去唱歌吧，十指緊扣不錯。」其後又插爆靚靚是「被害妄想」︰「民選冠軍得最受歡迎獎有乜問題，被害妄想，加油添醋。」接着又說︰「酸！夫婦倆如此輸不起。」
被辣興的靚靚愈看愈火，護夫心切不惜逐一反擊其中八位較「激憤」的網友言論，隨即掀起罵戰！昨晨約11時起，靚靚於短短個多小時內連環發招「回覆」，她寫着︰「很酸嗎？是你的角度，我是忠心的謝謝她們讓我得到手鐲！」再說︰「你有病嗎？你是來找事嗎？」事隔兩分鐘，靚靚再留言︰「你沒看清我意思，不怪你！」
「唔明啲人無限想像」
對於被指「輸唔起」，靚靚更激動地留言說︰「你能發表，為甚麼公眾人物不能？你看不明白，就不要來這裏！」怒火過後，靚靚似乎懶理網友的攻擊，面對其中有網友指「輸了獎，還要輸了胸襟」的批評，她只淡淡一句：「謝謝你的到來！」另一方面，亦有不少網友留言力撐，着她不用理會這些批評。
昨日靚靚接受電話訪問，對於在微博與網友開火，她輕鬆地說︰「唔係呀，只係我兩公婆打賭，真係收到好鍾意嘅禮物，真係好開心先忍唔住分享，唔明有啲人會無限想像，鬧我唔緊要，我唔會少忽肉，但鬧我粉絲唔得！」她直指若有網友在其微博留言爆粗會即時刪除，並再次反擊被指「輸唔起」的言論，她說︰「其實由始至終要搞清楚一件事，我冇話老公一定贏，我同佢打賭都係賭佢一定輸，大家諗得簡單啲，唔好無限放大。」
至於「當事人」Chilam對於老婆與網友隔空罵戰表示不知情及愕然，他接受電話訪問時回應︰「吓？咁得閒咩，我唔知喎！依家所有嘢都唔重要，我只係出席一個騷，聽聞最高有40點（收視），能夠亮相咁高收視節目相當榮幸。」
