吳君如、張家輝、梁家輝、陳奕迅（Eason）和王菀之等昨日在尖東拍攝電影《金雞SSS》，劇組在戶外搭建夜總會場地，非常揼本！第三度做「雞」的君如今次碌盡人情卡，邀得影帝級和天王級好友助陣，故多番強調要衷心感激他們：「我預咗要還！」又大讚首次做「雞」的王菀之有潛質做喜劇演員。

君如碌爆人情卡，邀得張家輝（左）和Eason演出！

另外，兩位家輝和Eason受訪時笑料百出，問到如何安慰失落亞太影展影帝的張家輝，梁家輝笑說：「輸咩？挑！」逗得全場爆笑！Eason則透露拍攝前導演給他兩個角色選擇，他最後選擇飾演張家輝的過氣手下，全因想跟對方做對手戲！梁家輝聞言即扮嬲說：「另一個角色係同梁家輝做對手戲，佢就冇揀到！」搞到Eason只懂尷尬傻笑。