入行三年多的歌手連詩雅,自言由備受照顧的小花,變成獨立懂得關心別人的可人兒。唱歌拍戲兩邊走的她,貪心地希望兩邊同樣兼顧,希望突破演醜角,更想擁有音樂會,事業心超強!

連詩雅希望唱歌電影同樣兼顧,事業心超強!

連詩雅上月出席金帆音樂頒獎禮時,在台上獻唱。

連詩雅在電影《喜愛夜蒲2》中,與關楚耀在電車上激咀。

連詩雅(左起)早前與蔣家旻、陳奐仁到旺角宣傳新片,大受巿民歡迎。

希望突破演醜角的連詩雅,底線是不可以露點。

自言不是靚女的連詩雅,認為內涵最重要。

連詩雅(Shiga)外表嬌滴滴,看似弱不禁風,入行三年多但負面新聞似乎離不開她,Shiga每次儼如有金剛不壞之身,走過每段艱難道路。回想起入行三年的點滴,Shiga自言成長不少,再不是要人呵護備至的「公主」,她說:「入行三年,覺得自己成熟咗。以前有負面新聞,我會好介意,雖然依家都好介意,但已經放鬆咗好多。以前會諗吓點去改變自己等大家鍾意我,但依家唔會,寧願大家接受我,咁先係真正嘅Shiga。」

嘗試新事物

Shiga入行初期得到公司及家人照顧,不過由於近年開始長大,公司已放手讓她嘗試不同的事物:「啱啱入行,公司會幫我襯好晒啲衫,但依家會放手畀我去試。(鍾意咩類型嘅衫?)乜都鍾意,甜美可愛、街頭同中性我都啱,所以喺屋企都儲落好多衫。」

Shiga又自言與身邊好友角色掉轉,她說:「之前好鍾意畀人照顧,但依家反而鍾意照顧人,我唔想畀人覺得我受保護,唔想畀人當係公主。其實照顧身邊嘅人仲開心,有次出Trip同事病咗,我會照顧番佢。(令身邊人驚訝?)唔會,但親戚朋友就會覺得我大個咗好多,個感覺都幾開心。」

醜角唔介意

過去一年,Shiga嘗試電影及唱歌,她坦言非常充實,但談到成績自言不敢講,因仍在學習階段:「今年我的確放咗好多時間喺電影方面,雖然係有Keep住練歌,但公開演唱少咗,想年尾放番多啲時間喺唱歌方面。雖然我唔似其他歌手咁,只係專注喺唱歌方面,但我已經好滿意工作安排,如果有獎拎我會好開心,但真係唔敢諗啦,唔想畀太大壓力自己!」

Shiga希望明年可以有自己的個人音樂會:「都想有新嘗試,好似合唱咁,如果可以嘅話,好想有自己嘅騷。」但談到電影及唱歌,Shiga貪心地表示,希望兩者可以同樣兼顧:「兩樣都鍾意做,唱歌就係抒發個人感受,但拍戲就做現實生活做唔到嘅角色。(想做咩角色?)我之前好驚做唔討好嘅角色,但作為一個專業演員,咩角色都要做,醜角我都唔介意做!不過我嘅底線,唔可以露點。」

拒公開戀情

感情冇着落的Shiga坦言工作至上,即使將來有拖拍,都會選擇不公開:「圈中人或圈內人都冇所謂,不過如果有我就唔會公開喇!因為我好難先會遇到感情,唔想畀人攻擊,想好好去保護。」Shiga坦言假若拍拖的話,必定會做一個「入得廚房、出得廳堂」的女友,她說:「我會好享受煮嘢畀佢食,最多我整,佢去洗碗囉,呢啲係情趣嚟嘅!」

後記:自我增值

樣貌屬女神級的Shiga,在訪問期間輕易擺出多個甫士影相,不過她坦言自己並不是靚女,她說:「只可以話OK,我從來都唔覺得自己係靚。」年紀輕輕的她表示「美」並不是一輩子的事,增值自己才是最重要:「靚唔係一世,人有內涵先係最緊要,所以我都成日去學嘢自我增值。」