蔡少芬(Ada)與老公張晉及兩名愛女,一家四口昨日為自家開設的童裝旗艦店開幕剪綵。Ada的女兒相當乖巧,全程都沒有扭計,長女楚兒更大擺甫士,被媽咪取笑是「作狀Princess」,Ada笑言此店是其最小的BB:「投資咗8位數字,會努力養大佢!」在旁的張晉即說:「恭喜蔡總生意興隆!」他又表示此店可讓Ada發揮藝術細胞:「啲衫佢都有份設計,個女都有畀意見。」Ada透露明年將在上海開設分店:「我希望設計埋爸爸媽媽嘅衫,一家人就開心。」

蔡少芬及張晉帶同兩名女兒剪綵,一家四口樂也融融。

談到內地節目《爸爸去哪兒》Hit爆,張晉透露製作單位曾提出邀請:「大女雖然生得高,但係得兩歲,溝通唔係好流利,等大啲先啦!」他又指長女現時愛黐着他:「我會教佢『爸爸is a man!』佢最愛我啲鬍鬚。」Ada即笑說:「好失落,好心痛呀!不過都要學識放手。」