雨僑勤用美容機，聲稱碌幾日已明顯見到分別。
美容達人雨僑經常將化妝、保養及護膚心得拍成短片放上網，與一眾姊妹分享。臨近聖誕，又是大家扮靚出席派對的日子，今次雨僑便教大家如何從內到外做好準備！扮靚先要從內開始保養，皮膚質素好，已是為靚妝打好基礎。
雨僑護膚絕不偷懶，難怪皮膚保持白滑。
美容機是雨僑護膚不可或缺的重要一環。
化妝掃對於一個完美無瑕的妝來說十分重要。
平日不時按摩腿部的雨僑，拍廣告時自信大騷美腿。
雨僑愛自拍美容短片，素顏示人都冇有怕啦！
雨僑深明要有靚靚皮膚，保養非常重要，但作為藝人，根本沒可能定時作息：「我係冇可能瞓美容覺，平均都可以瞓6、7個鐘嘅，但就唔定時，對皮膚係冇咁好o架喇！惟有做多啲其他嘢補救啦！湯水對女人嚟講好重要，我鍾意飲花膠湯，媽咪個個星期都煲畀我飲。冬天我都鍾意飲黑糖薑茶，又保暖又有營養，補血得嚟又冇紅棗咁燥，對女仔好好。」她又喜歡點香薰紓緩，並推介一個新方法：「因為我屋企有貓唔點得火，我會倒幾滴香薰油落枕頭，咁樣會好瞓啲！我自己最鍾意玫瑰同天竺葵味，同埋我會帶香薰油畀按摩師幫我按摩全身，有滋潤效果。」
美容機器助升Cup
此外，美容機更是雨僑護膚不可或缺的重要一環，她興奮地推介：「呢部機真係好勁，除咗可以瘦面、通淋巴，仲可以豐胸！我由4月開始用，用咗大半年，效果真係幾明顯，碌咗幾日已經明顯見到分別。我最鍾意個豐胸效果，因為由A變C Cup，當然要配合飲食啦！」不過，美容達人都有懶惰的一刻，她說：「如果想豐胸當然碌得愈密愈好，不過碌得耐都會手攰o架嘛！所以依家未必晚晚碌，大約一星期一次左右啦！」
推出自家化妝掃
講完保養，來到化妝部分，工欲善其事，必先利其器，雨僑認為要化一個完美無瑕的妝，化妝掃佔了非常重要的部分：「用啱咗工具，成個妝會淡啲，因為個掃沾嘅分量冇咁重，而且幼細啲嘅位都會掃到，個妝亦會Last得耐啲！」雨僑最初化妝時因為貪平，買了一些較廉價的掃：「細個唔識買，買咗啲平掃勁甩毛，又拮面，雖然拮面唔會話傷皮膚，但化出嚟就冇咁靚囉！胭脂重到好似馬騮屎忽咁，之後錯多啲試多啲唔同嘅掃就開始識揀。」各大牌子的化妝掃價位不菲，動輒幾千元一套，故雨僑把心一橫推出自家化妝掃：「我覺得款式好重要，所以我揀咗玫瑰金加白色，感覺優雅啲。當然質量都好重要，例如大胭脂掃我用咗山羊毛、黃松鼠毛咁，其實大品牌都係用緊呢種毛，不過我慳咗舖租咪可以賣平啲。」
沒有醜女人 只有懶女人
雨僑被稱為美容達人實在當之無愧，無論美容或化妝，她總能夠娓娓道來自家心得，而且絕對不是紙上談兵，看過她素顏的人必定被她的白滑皮膚吸引。原來「世上沒有醜女人，只有懶女人」這句話說得沒錯，要有靚皮膚，的確要經長年累月、努力護膚才能擁有。
音樂組
