「巨聲幫」的胡鴻鈞出道一段日子，家裏收藏的歌迷心意卡多如幾座山，胡媽媽曾嫌「阻碇」勸他清理，豈料他竟為歌迷而頂撞母親！他指有歌迷曾在心意卡上自爆因他而發憤讀書，成績更「大躍進」！

胡鴻鈞在廣州舉行首個簽唱會，粉絲多到逼滿商場！

難得咁多廣州粉絲撐場，胡鴻鈞即自拍留念。

粉絲送上心意卡，令胡鴻鈞勁感動。

胡鴻鈞手起筆落，簽名簽到手軟。

胡鴻鈞（Hubert）早前在廣州舉行首個簽唱會， 激讚當地歌迷非常熱情，撐場粉絲多到幾乎塞爆商場，令他大感意外。簽唱會上，Hubert收到不少打氣禮物，有熊仔又有零食，但最令他窩心的是一張貼滿心心的心意卡，他說：「我首新歌《勇氣》係寫畀歌迷，多謝佢哋一直支持我，佢哋就特登每個人寫啲說話畀我，感覺好Sweet。」

做榜樣鼓勵讀書

問到有沒有歌迷在心意卡上示愛？Hubert尷尬笑說：「咁又冇，佢哋寫啲嘢好正面o架！依家屋企儲咗好多打氣卡，有次媽咪叫我清走啲，我都即刻阻止佢！」他還自爆其中一位女歌迷因為他而發憤讀書，連對方母親亦直豎拇指：「個女Fans話見我之前一路讀書一路唱歌都兼顧到，所以話要以我為榜樣，喺最近一次考試仲考到好好嘅成績，估唔到做歌手嘅同時可以影響到人。」

提到聖誕將至，Hubert呻沒有佳人相約，卻享受與工作拍拖過聖誕：「聖誕好多嘢做呀，又冇人約，好過喺屋企望牆啦！」他又透露正計劃聖誕過後請家人旅行。