自陳豪結婚後，馬國明成為無綫頭號筍盤，連討論區的男神選舉，他都榜上有名，「馬明BB」之名當之無愧，全港女士虎視眈眈，但他直言冇女埋身，Dry足兩年，公開呼籲對他有興趣的女士們主動追求自己。港女們，GO GO GO！

馬明高大又靚仔，難怪深得港女歡心。

馬明相信緣分，不排除閃婚的可能。

馬明受無線力捧，自言會好好珍惜。

藝人馬國明近年極速上位，在多部無綫劇中擔任男主角，但回想2004年，無綫將他與吳卓羲、林峯及黃宗澤等受力捧的六位小生組成「奧運六星」，九年後，他們的發展都大有不同，其他人早已上內地拍劇拍電影，狂賺人仔，但馬明似乎在近兩年才冒起，今年才首次拍攝電影，他坦言星途的確發展得較慢，但絕不心急：「始於大家嘅路唔同，好難比較，我係由訓練班開始，做吓做吓，啲監製覺得馬國明幾好使，先拎嚟用吓。娛樂圈係長途賽，你唔會知個運幾時嚟，所以好難計，只可以睇韌力夠唔夠。」

過咗反叛期

馬明形象健康，深得觀眾歡心，即使成為一線小生都毫無架子，而上年台慶頒獎禮時的「O嘴」表情堪稱經典，被觀眾認識到他的率真，他說：「電視機入屋，容易畀觀眾受落，演員形象好，演角色就方便啲，我冇特登去Keep，只係咁啱唔鍾意去夜街，我25歲先入行，過咗反叛嘅時候，玩夠啦！」他續說：「唔覺自己賺咗，可能唔係一出嚟就受力捧，得來不易就識得珍惜！」

明年踏入四字頭的馬明，經常被問到感情問題，單身兩年的他自言相信緣分，不排除閃婚：「我唔恨拍拖，唔係我40歲啦！要結婚啦！所以拿拿臨搵個女仔結，我信緣分，遇到好啱嘅，可能唔夠半年就結都唔定。」他更笑言自己非常被動，呼籲女士們主動追求：「我比較被動，唔該有興趣嘅主動少少！」