有份提名今屆無綫視帝的吳鎮宇，面對同劇的張智霖被捧為頂頭大熱，似是「棄戰」的他懶得拉票，寧願輕鬆地享家庭樂，更踎晒地為囝囝影相。

未有出席拉票活動的鎮宇，樂於拖着愛兒去街街，享受做慈父多過做視帝。

為拍下動作多多的兒子，鎮宇又踎又跪，吳太應該冧爆。

鎮宇開飯前睇玩具，唔知想買畀自己定畀阿仔玩呢？

鎮宇的囝囝活潑好動，跟住媽咪行街零舍多動作。

吳鎮宇今年和張智霖（Chilam）回巢無綫合作拍劇集《衝上雲霄II》，更齊齊角逐視帝，然而劇中由張智霖所飾演的「Cool魔」一角，由播出開始已經Hit到爆，風頭一時無兩，更一直被外間捧為視帝大熱。深知自己呼聲不高，鎮宇亦缺席拉票活動，前晚輕鬆地與太太王麗萍及愛子一家三口到銅鑼灣預祝他本月21日的52歲生日。

當晚7時許，鎮宇一家現身時裝店，逛完一輪之後兩夫婦分道揚鑣，太太拖實囝囝往商業大廈，鎮宇則先行去餐廳搵位，未幾一家人會合開餐，期間鎮宇發現記者蹤影，友善地望鏡示意。等食期間，廿四孝老竇的他更帶囝囝去行玩具店打發時間。至晚上9時許，鎮宇一家食飽飽步出，行至商場內的聖誕布置前，鎮宇為囝囝充當私人攝影師，眾目睽睽之下踎地拍攝，只見活潑的囝囝不停擺甫士，相當可愛。

台慶夜搵人仔

記者致電鎮宇，問到可會出席下周一的《萬千星輝賀台慶頒獎禮》？他說：「當日要喺內地開工，如果到時拍得晒會出席嘅，都有人幫我搵緊戰衣。」提到早前於《TVB馬來西亞星光薈萃頒獎典禮2013》勇奪「最喜愛TVB電視角色」，鎮宇笑說：「我都唔知有獎添。（有信心得獎？）平常心啦！」