現年58歲的武打影星劉家輝前年因中風導致右身癱瘓,經過年多來的休養及治療已康復不少,他前日坐着輪椅由友人陪同到中環歎茶。戴上鴨舌帽及穿上紅色外套的劉師傅精神不錯,並由戴口罩的女友人餵食雲吞,期間坐於鄰桌的楊千嬅埋單離開時發現劉師傅,立即上前慰問,只見千嬅輕拍劉師傅膊頭外,又拿出電話給他細看,劉師傅亦多次微笑點頭。事後記者致電千嬅,提到巧遇劉師傅,她說:「係呀!我即刻過去同佢打招呼,見佢精神好好又食緊嘢,我仲畀我個仔啲相佢睇,師傅睇完仲笑笑口話:『嘩,好大個仔喎!』真係好開心見到佢精神好好,希望佢身體愈來愈好啦!」

千嬅發現劉師傅即上前輕拍他膊頭慰問。

戴帽及穿紅色外套的劉師傅精神不錯。

千嬅與友人歎茶,見到記者即開心打招呼。