何嘉莉母親的抉擇

何嘉莉18歲入行，當年與天后容祖兒及前歌手葉佩雯被喻為「英皇三小花」。入行初期，Lillian留有一頭長髮，面上還有可愛的Baby Fat，典型的玉女。戀愛大過天的她，後來被指掛住拍拖而遭公司雪藏，心灰意冷下退出幕前，後來當上形象指導，為自己找尋另一條出路。

戀愛大過天

現時剪了一頭清爽短髮的Lillian，骨子裏就是個爽直的人，當年塑造的玉女形象，現在看來其實不是真正的自己。與甜品店太子爺黃逸璋於2006年拉埋天窗，二人拍拖一年便結婚，問她是否一個戀愛大過天的人？她想了想說：「我諗都係，我算係一個浪漫派嘅人，其實我冇特別計劃，我唔鍾意乜都計劃定，咁樣會好大壓力，好似生BB咁，其實都唔係我計劃之中，嗰陣我開始籌備緊間時裝店，BB係意外，咁有咗當然會要！」

人都要在經歷過後，才領悟到自己真正所需：「有時一個人未遇到嗰樣嘢係唔知道自己想要乜嘢？我未生之前都唔係咁鍾意小朋友，亦都唔一定話要生，都係抱住隨緣心態，但當有咗之後，仲要咁啱喺我最忙嘅時候有，我覺得係個天想考驗我，生咗之後，老公同我講，原來你係一個幾好嘅媽咪，我自己都唔知。」

三歲定八十

去年，Lillian與Moiselle太子爺陳柏熹合作開設時裝店「Dour Studio」，店內服飾大部分是二人從外國引入，走型格高檔路線，圈中不少名人明星都有光顧，早前何韻詩演唱會亦有佩戴店內首飾。

能夠從事時裝行業，打扮當然入流，思想也不會太過時，Lillian一直認為女人可以一邊擁有事業，另一邊擁有家庭，直到現在，她也是這樣想的，只是當孩子來臨了，正如她所言，就會發現甚麼是第一位，生命的比重當下就能釐定，她續說：「生完BB之後，我請咗個陪月，屋企人都有幫手湊，嗰時覺得好輕鬆，自己就好放心將成副心思放喺舖頭上面，因為中間佗BB時有啲嘢自己做唔到錯過咗，同埋開時裝店一直係我嘅夢想，所以當時雄心壯志，仲諗住要周圍飛入貨，同埋加入自己嘅設計，但到依家覺得要Hold一Hold，因為個仔開始大，陪月走咗，我唔放心全部畀晒工人湊，工人一定會就晒佢，會形成佢性格霸道同野蠻，我都開始Feel到佢有啲脾氣，人哋話小朋友三歲前就會定性格，我覺得應該畀多少少時間教佢，同佢溝通，小朋友係一張白紙，佢乜都唔識，所以身教好重要，但我會盡量平衡，如果要我成日湊住佢都會悶！」

Lillian表示多得網上世界的發達，有很多生意上的事情可以在家裏待囝囝睡覺後做，誰說女強人容易做？

相處懂妥協

Lillian強調自己對事業仍然充滿期待，只是刻下要將時間多分配在家庭上，除了兒子，還有丈夫，畢竟兩個人相處都要花時間和心思。結婚七年，問到與年長五年的老公可怕七年之癢？她笑說：「其實兩個人相處真係一場學問，我同老公都係火爆嘅人，拍拖嗰陣因為嗌交已經掟爛過好多部電話，結咗婚之後都有，但依家仔都有埋，心態真係會唔同咗！依家大家識得協議，無論點嬲都唔可以講啲衝動嘅說話，如果嗌交就大家冷靜吓，有啲說話要諗過先講，衝口而出嘅說話好傷人！」

家有一位妹妹的Lillian，總認為小朋友有個弟妹依伴，能夠互相扶持會比較開心一點，但她又甚矛盾，她搖搖頭笑說：「暫時唔好搞住，體力真係支持唔到，尤其是生男仔，佢真係精力充沛，好似隻馬騮咁冇時停，如果再生都想要個女，但女仔又會擔心啲，因為男仔比較堅強，我教個仔都係，佢跌倒會叫佢唔好喊起番身，女仔就唔可以，所以都係嗰句唔計劃最好，一切隨緣等個天幫你決定！」

後記：多一份溫柔

何嘉莉沒有說謊，大半年前曾跟她做訪問，當時剛產後不久的她，的確表現一臉悠然自得，還在大談時裝經；這次訪問，感覺到她的一點蛻變；沒變的是外表依然酷酷的，說話依然沒甚尾音，但嘴角卻多了一份溫柔的微笑！