憑節目《星夢傳奇》一炮而紅的鄭世豪昨日「小登科」，於旺角一間酒店筵開40席，他透露跟太太Christy在巴士上結緣，故這天特別重遊舊地拍下甜蜜照片，又承諾以後會超錫太太，甚至整份人工奉上都冇問題！

鄭世豪對太太情深一吻晒幸福，羨煞旁人！

鄭世豪做老襯，一眾好兄弟接新娘時都替他高興！

鄭世豪和太太的愛情萌芽於巴士上，結婚相當然要同巴士一齊影！

馬國明現身祝賀鄭世豪新婚之喜，在場外拍照留念。

鄭世豪昨日「小登科」，一對新人早上先穿傳統中式禮服亮相，郎才女貌，到處留下甜蜜倩影，最特別的是在巴士前拍照，世豪解釋他跟太太於巴士上認識，就連求婚都是在巴士上：「當日做到好似所有朋友都喺巴士上遇到，太太好驚喜，但今日重演呢一幕我就覺得好難啃！因為班姊妹要我企喺石春路上再做一次！我平時連做腳底按摩都怕，佢哋就睇準我呢個弱點！」幸好有鄭俊弘、楊明等一眾兄弟幫手才能過關。

加碼利是冧掂姊妹

世豪十分感謝太太，因為他原先以為有足夠時間陪她籌備一切，但隨着工作量上升，最後未能一起享受整個籌備過程：「我都覺得有啲遺憾，好多謝太太體諒我，我以後會更加錫佢，就算畀晒成份人工佢都唔介意！」又表示心情興奮，問到開門利是，世豪笑言一班姊妹十分滿意，因為他有臨時加碼。在喜宴上，世豪表示暫時會享受二人世界，但未計劃度蜜月的地方，不過無論太太想去哪裏都會陪同。

另外，現身致賀的有森美、麥長青、陳敏之、馬國明等，「星夢幫」成員因要綵排東華節目，只好缺席。麥包自稱做人情最實際，希望世豪跟太太凡事會互相包容。提到陳豪和陳茵媺已榮升父母，麥包表示太太已探望BB和送上利是。