曾被拍到與薛凱琪夜蒲兼「慾火街頭」的舞台劇演員湯駿業，大方承認二人關係親密。二人雖曾狂煲通宵電話粥，可惜最終都是「冇米粥，煲唔起」！事業沒有起色的他，還慘遭家人白眼！

湯駿業大方承認與薛凱琪關係親密，但大家只可以做好朋友。

薛凱琪曾被拍到與湯駿業在夜店疑似咀嘴，因而傳出緋聞。

舞台劇演員湯駿業（阿Dee）與薛凱琪（Fiona）曾被拍到在夜蒲時疑似咀嘴，因而傳出緋聞，阿Dee直言與她合作舞台劇，在綵排時日對夜對兩個月，大家建立了一份信任，到了後期，他才發現Fiona有抑鬱的症狀：「就係咁大家多咗了解，而我喺嗰幾年都有啲唔開心，會同佢分享，我諗呢啲係作為好朋友互相扶持嘅時候，所以嗰陣傾電話傾通頂，傾到大家攰喇，想瞓先收線囉！」

問到二人是否情侶，阿Dee即反駁：「好朋友都得嘅。（對佢有感覺？）好好朋友囉！我又冇諗太多喎，唔會o架我哋，我哋係朋友嗰隻互相扶持。（直到依家？）係呀。（未來發展？）依家都幾好呀，我哋咁好朋友，希望佢可以搵到個好錫佢嘅人，因為佢係一個好好嘅女仔。工作係佢第一樣要應付嘅嘢，佢係一個好有責任心嘅人，如果佢唔係因為咁大壓力，啲人比較容易埋佢身。（你照顧佢？）冇諗呀，我哋係好兄弟、好姊妹，有時唔一定要行到嗰一步嘅。」

屋企人潑冷水

提到家人對其事業的看法，他說：「我諗佢哋放棄咗我o架喇！因為開頭我揀做戲，佢哋都已經唔太贊成，我記得有一次，我邀請咗我嘅屋企人嚟睇我套戲，點知睇完之後我阿媽同我講『得啦！畀心機做啦！我今個禮拜嗌埋五姨嚟！』嗰陣我好驚喜。」

他又自爆家人曾對他冷言冷語：「我記得早幾年返去食團年飯，我舅父問我做咩唔考無綫，好似王祖藍咁咪幾好，可以搵多啲錢！我嗰刻好灰，好尷尬，因為祖藍係我嘅同班同學兼好朋友，我當然會戥佢開心，但當屋企人攞身邊嘅人嚟同你比較，就會好灰。」