方力申及鄧麗欣（Stephy）早前以情侶檔上陣，偕唐寧到越南貧困地區探訪兒童。愛心爆棚的Stephy及小方身體力行助養當地小孩，Stephy更趁是次探訪取經，為日後當媽媽做足準備！

小方及Stephy感情穩定，不如早日結婚生B？

Stephy（左）、方力申及唐寧齊齊到越南探訪兒童，愛心爆棚！

方力申及Stephy探訪後決定助養兒童，為慈善盡一分力。

方力申、鄧麗欣及唐寧早前以「方唐欣」組合，遠赴越南中部的崑嵩省進行親善探訪。貴人出門招風雨，唐寧透露探訪時當地正在打風：「我去到嗰陣天氣變差，開始落雨，小方佢哋到嗰陣颱風就到，落大雨搞到條路變咗河！我哋架車畀淤泥食實，要幫手推車，仲要澗水過河！」

助養展愛心

當地環境惡劣，小朋友身世悲慘，令三人大為心酸。愛心爆棚的小方及Stephy以身作則，助養當地小朋友，榮升「爸爸」及「媽媽」！母愛氾濫的Stephy更藉着此行累積經驗，為將來當母親做足準備：「我雖然未係媽媽，但將來一定會生小朋友，今次可以累積經驗，學識點教佢地。」問到天災連連，又親眼目睹越南兒童的惡劣生活，會否對生B感卻步？她說：「唔使咁悲，將來係一個未知數，唔應該剝奪佢哋嘅將來。」

任小朋友發揮天分

每位父母都希望子女能有十八般武藝，問到可會望子成龍？Stephy說：「唔想逼佢哋，之前睇過詹瑞文嘅訪問，佢發覺小朋友鍾意畫畫，就畀幅牆佢畫。我覺得將來小朋友鍾意咩，就任佢發揮。」在旁的小方說：「每個人有唔同天分，做父母應該發掘小朋友嘅天分。（有冇同Stephy傾過生小朋友？）日日都同佢講，不過我哋冇結論，都係講吓邊個個仔靚啲。」