陳豪（Moses）昨日於活動身穿紅西裝，在喜洋洋的氣氛下首次披露當新手爸爸的感動及喜悅。他透露老婆陳茵媺前日下午順產誕下囝囝，老婆現以母乳餵哺。他6次大讚囝囝靚仔，問到愛兒像誰？他說：「個個都似啲！」

陳豪榮升爹哋，即到商場出席活動搵銀。

初為人父的陳豪全程笑晒口，知你有子萬事足喇！

陳豪的哥哥陪同母親探望豪B，笑容滿面。

陳豪的母親對孫兒讚口不絕！

榮升父親的陳豪前日因病失場，但所謂「人逢喜事精神爽」，他昨日心情大靚地公布：「我諗大家都知道，我嘅Baby終於喺尋日Arrive（來臨）咗，呢份係我最大嘅聖誕禮物！」Moses又透露，老婆陳茵媺（Aimee）前日下午突然作動，在醫生建議下入院待產，只花6小時便誕下囝囝，英文名是Aiden，重6磅11安士。

Moses六次大讚囝囝靚仔，並表示親手剪臍帶一刻大為感動：「我陪佢入產房幫手打氣，當時我好緊張，但乜都做唔到，只靠Aimee努力。生BB真係唔容易！（送禮物補償？）點都得啦！做媽媽好辛苦！（餵人奶？）Breast Feed！（似邊個？）個個都似，好靚仔！（遺傳？）唔係讚自己靚仔，但BB真係好靚，似媽媽都靚！（Aiden個名有意思？）有，但唔透露喇！中文名我會同Aimee一齊改，但都會問老人家意見。暫時我媽媽見咗孫仔，岳父、岳母就未飛到番嚟。（你咳仲抱BB？）我有戴口罩！」據知，Aiden的意思是Little Fire（溫暖小火），認真溫馨！

完騷即赴醫院陪妻兒

提到前日失場，Moses強調當日真的病倒，只是下午遇上太太作動。他表示與Aimee行事低調，只想安靜迎接愛兒來臨，故事前沒有告知任何人，直至BB出世後才公布消息。他又表示會盡量抽時間陪妻兒：「Aimee佗BB已經耐、好辛苦。（再追？）遲啲先，等大家都抖吓先！（仲好興奮？）真係有啲！唔相信已經變為事實！（Aimee之後會拍劇？）等公司安排啦！（親手幫咗BB沖涼？）未，但試過換片，So far so good，叫做避到個『噴泉』，手忙腳亂得嚟算幾好！」

另外，Moses完成活動後，昨晚在兄長接載下，與母親到山頂嘉諾撒醫院探望Aimee。陳母下車時手持BB用品，問到有否見過BB？她說：「見過！我唔靚，唔好影我啦！」而戴口罩的Moses則狂咳，問到可擔心傳染BB？他即說：「啋！啋！啋！唔會傳染！」他昨晚留通宵陪妻兒。其後，Aimee好友朱凱婷及老公亦帶着禮物到醫院探望。

豪B財運桃花俱旺

Aimee前日凌晨於微博宣布愛兒出世，批中她首胎是男丁的堪輿學家陳子才表示，BB財運及桃花運均十分強勁，似足父母人緣，搵銀能力亦高：「佢命格屬木，身材一般都比較高大，似足爸爸。佢自坐財星兼桃花星，代表一生財運同異性緣特別強。」他又指BB親母旺父：「BB同媽媽緣分較強，感情上好啲，而財運就旺爸爸。」問到Aimee及Moses會否再追生？陳子才說：「根據陳豪命格，佢會有一仔一女，最快嚟緊羊年（2015年）有喜！」