嘉欣甜蜜爆喜「訊」

張智霖及鍾嘉欣前晚在《TVB馬來西亞星光薈萃頒獎典禮2013》中勇奪視帝視后，證明兩人在劇集《衝上雲霄Ⅱ》及《巨輪》的角色極受歡迎，首度封后的嘉欣在台上激動變「喊包BB」，而Chilam近兩周內接連在內地、香港、新加坡及吉隆坡狂掃六獎，非常威水！

完騷後，大部分藝員包括Chilam、嘉欣、曾志偉、馬國明、岑麗香、羅仲謙及蕭正楠等往餐廳慶功，吸引半百Fans在門外守候，眾星離開時要保安開路，當中以視帝Chilam最受歡迎，大批Fans湧上前索簽名及拍照。他透露太太袁詠儀（靚靚）戥他得獎非常開心：「阿靚即刻打畀我，不過囝囝就差唔多瞓，冇講啲咩。（有信心贏無綫視帝？）平常心，兩個頒獎禮冇咩關係，相信公平。（有咩心水？）視帝個個都好，女仔就睇好鍾嘉欣。」

爆喊完聲沙沙

嘉欣於昨午約三時返港，拿着視后獎座的她與約30名Fans逐一合照，聲沙沙的她笑言在台上爆喊是自然反應：「始終第一次攞視后，好深刻，宣布結果前係平常心，一聽到自己個名就諗『吓！真係我？』諗番初入行嘅經過，得到海外觀眾認同特別開心。」她表示若再攞獎希望可忍住唔喊，問到有否壓力？她說：「冇，心情平靜，希望快啲慶祝。（恭喜張智霖？）親自恭喜咗，希望有機會合作學嘢。」」至於緋聞男友伍允龍有否恭喜她？嘉欣甜笑點頭：「有收到佢短訊，仲有好多恭喜短訊。」而Chilam則轉機往長沙繼續工作。