陳嘉佳曼谷着紅衫遭怒睥
港府昨日對曼谷發出紅色外遊警示，憑無綫劇集《老表，你好嘢！》中飾演「細細粒」彈起的陳嘉佳（小寶）卻身在當地，她前日外出時，誤穿被視為親政府的紅色衫，慘遭當地反政府市民「怒睥」，嚇破膽的她即雞咁腳返酒店避難，更被迫困在酒店，肚餓時惟有食「手信」。
穿紅衫自拍的小寶相當驚慌。
小寶昨日出街再買「手信」，但沒有再穿紅衫。
小寶開始時膽粗粗，以手機拍攝示威場面。
子華與小寶在《My盛Lady》中合作，戲內戲外都很有默契。
泰國反政府示威連日來不斷惡化，香港政府昨日已對曼谷發出紅色外遊警示，呼籲香港市民如非必要，應避免前往當地。近日在無綫新劇《My盛Lady》中飾演Judy而人氣再度急升的陳嘉佳，上周六與朋友到曼谷，豈料碰上示威。前日可算是泰國最混亂的一天，連港人旅遊熱點的暹羅區（Siam）大型商場，亦相繼宣布停業一天。全不知情的小寶出門時竟誤着被視為親政府紅色衫外出，被反政府示威者「怒睥」。昨日她接受本報長途電話訪問時說：「我太趕時間，求其就搵咗件紅色衫嚟着，朋友又冇提醒我。點知行到去，就不斷發現有當地人睥住我，仲兇神惡煞，其實當時都好驚o架，仲驚到個心離一離添，幾驚佢以為我係紅衫軍，會衝埋嚟我度！」
主力掃胸圍
起初小寶「唔識死」，行街時發現有大型示威，即以手機拍片：「行行吓見到有人示威，聽到好多哨子聲，佢哋不斷叫口號，情緒好激動，當時因為人太多，連車都行唔到，啲人又塞住晒，見到有旅客舉起手機拍片，所以我咪趁熱鬧拍埋一份囉，之後我都即刻拿拿臨走人，返酒店算啦！」她更笑言今次主力到當地大掃胸圍：「我好難買Bra，諗住可以嚟到買多啲，點知依家咁混亂，都係下次先。」因局勢混亂，小寶被迫留在酒店，對食物有要求的她，因嫌棄酒店食物難食，又難忍飢餓，故將「手信」食清光：「我買咗杧果、豬肉乾、朱古力等，諗住返嚟派畀朋友，點知因為太肚餓，一路睇電視一路食，咁就食晒啦！」而小寶昨日外出時，曼谷市變得較為平靜，她亦補買「手信」送給朋友。
機場瞓地撲機位
雖然旅程今日才結束，不過心急返港的小寶昨日坦言要早24小時到機場買機票：「唔知局勢會發展成點，驚有錢都搭唔到的士，所以都諗住今晚就去機場瞓，睇吓有冇候補機位。（點瞓呀？）拎啲毛巾包住自己，再帶多咗幾件衫，可以當被冚，就算瞓地下都要o架啦！不過經歷過畀人睥之後，唔敢再着紅色喇！」自言有機會在機場「隨時候命」的她，會自備乾糧，但不排除再食「手信」：「都唔知要捱幾多個鐘，又唔知機場有冇嘢食，如果食晒啲乾糧就要再食手信，希望如果冇手信派，啲朋友唔好嬲我啦！」
