一代巨星梅艷芳（阿梅）逝世十周年紀念展昨日揭幕，其生前好友譚詠麟（阿倫）暫時「撇甩」好拍檔李克勤唔排練演唱會，現身主持揭幕。現場有牧師為全場領唱阿梅和阿倫的經典名曲，但唱到五音不全，連阿倫都睇唔過眼出口相助！

阿倫見到細粒版「阿梅」如此可愛，即時開心攬住她合照！

牧師（左）領唱時唱到五音不全，阿倫忍不住出口相助！

Desmond（左起）、阿倫和蘇蔡潔蓮一同在台上為紀念展揭幕。

由《梅艷芳四海一心慈善基金》和《芳心薈》合辦的《STAND BY ME梅艷芳十周年愛心慈善月》昨日在商場進行揭幕儀式，紀念阿梅今年逝世十周年，雖然阿梅生前好友譚詠麟正忙於為《左麟右李》十周年演唱會落力綵排，但仍特地抽時間出席。在台上，《梅艷芳四海一心慈善基金》主席蘇蔡潔蓮女士致送一件以阿梅過往CD封面以及演唱會海報設計成的T恤給阿倫，其後由牧師鄭守定帶領現場歌迷一同合唱阿梅和阿倫的經典歌曲，不過唱到走晒音，要阿倫開金口幫忙，還講笑整蠱牧師：「天父係唔會怪你嘅！」

落台後阿倫大讚阿梅的風采難尋：「到今時今日都冇人有佢嘅風采！（會唔會去佢個紀念演唱會？）未必，好似有嘢做，可能唔喺香港。」說罷隨即欲匆忙走人，並解釋：「隊Band同克勤等緊我，停咗咪成兩個鐘頭！」而到場支持的梅媽憶女眼濕濕。

蘇頌輝難忘一面之緣

藝人蘇頌輝（Desmond）以嘉賓身份出席，他分享對阿梅的印象：「我媽咪好鍾意佢，所以成屋都係佢嘅海報同CD，細個嗰時媽咪帶過我去梅姐同星爺（周星馳）拍嗰套《審死官》探班，有次梅姐去多倫多開演唱會，見到佢身邊有好多保安圍住，感覺好震撼！」