何潤東（Peter）昨日出席《MegaBox夢幻旋轉聖誕城 X 何潤東聖誕卡簽名會》，期間大會安排兩位小女孩向他獻吻，又獲MegaBox總監文靜芝贈送狗公仔，寓意Peter盡快覓得可愛、溫馴的女友。正在橫店拍攝內地劇《芙蓉錦》的Peter表示，希望向劇組爭取一日假期跟大家搞聖誕派對。在台灣與父母同住的他又透露忙於搬新家，更自爆被催婚及裝修BB房：「媽咪、爹哋預先幫我設計咗間Baby房，可能無形中想畀少少壓力我，間房重要喺我房隔籬。（BB房有畀意見？）冇呀！我意見係唔好整住，我都未有BB，但佢哋話整住先，整完就有o架啦！」

何潤東獲MegaBox總監文靜芝贈送狗公仔，寓意盡快覓得可愛女友。

何潤東熱情地與大批粉絲握手。

何潤東獲穿上聖誕裝扮的小朋友主動獻吻，甜到漏！

從杭州抵港的何潤東，心情大靚。

巡大學物色女友

提到台灣女星吳亞馨為某公司代言，有指Peter是該公司的股東，更指男方從中幫手牽線，二人因此傳出緋聞，但Peter強調目前未有女友：「嗰個真係好大嘅烏龍，我哋拍完《泡沫之夏》後就完全冇聯絡。（你係嗰間公司嘅股東？）我都唔知係乜公司，同我完全冇關係。（兩個有冇發展機會？）應該冇機會，因為我哋幾年冇聯絡。」問到會否學王力宏收埋女友？他說：「我諗大家都可能會咁，每個藝人都希望有自己嘅私隱。（拍拖會公開？）結婚一定會，如果有拖拍的話，我考慮吓會唔會公開。」現年38歲的Peter，直言結婚生仔急不來，而他透露喜歡開朗及帶點野性的女仔，並笑言要學王力宏在大學搵女友：「呢排要去唔同大學行吓。」