陳嘉桓築牆斷紅線

大部分少女都希望停留在青葱歲月，青春常駐。陳嘉桓剛剛踏入21歲，但不經不覺間，已在娛樂圈度過了5年光景。16歲入行的她，獲恩師冼國林垂青並羅致旗下，經公司悉心培訓後，以打女形象殺入娛樂圈，並先後參演多部電影，包括《葉問前傳》、《人約離婚後》及《笑功震武林》等，同時成為廣告界的新寵兒。踏入21歲，Rose表示不介意早點成熟起來：「我身邊仲有好多舊同學讀緊書，閒時聚會都會講及近況，我比較早出嚟社會工作，大家生活圈子自然唔同。早啲投入社會工作未嘗唔係好事，尤其娛樂圈變化又多又大，接觸嘅事物又新又快，需要好強嘅適應力。」

身為公眾人物，日常生活與入行前大為不同，但Rose自言是簡單的人，不會因藝人身份而局限嚮往的生活方式：「我會同家人去大牌檔，去快餐店食快餐，會搭地鐵。你可以話我平民化，因為我私底下都係一個平凡嘅人，我嘅生活就係咁，唔想因為工作而改變。如果工作上有壓力，有問題解唔開，我都會去行山減壓，感覺好舒服！」

慨嘆失卻友情

人生中最青春的5年在水銀燈下度過，當中必然有得亦有失，她表示當初是自行選擇這條路，會接受得與失的風險：「娛樂圈帶畀我好多嘢，首先要多謝伯樂冼國林師傅，佢教識我好多嘢，相信我喺處事同思維上都比同年紀嘅同輩成熟，見識到好多嘢！」她自言最遺憾是失去了與朋友的感情：「生活好似缺乏咗友情，好多時朋友聚會，我都會因為工作而未能赴會，漸漸同大家開始生疏。我會盡量透過電話、短訊同大家保持聯絡，令大家唔好因而變得陌生。」

恨出走享簡單生活

Rose多年來不乏花邊新聞，但她指緋聞對象全都不是真命天子：「多年嚟大家都好關心我感情狀況，但報道過嘅都唔係我男朋友，全部都係朋友，父母都識佢哋。」問到身邊為何沒有狂峰浪蝶？她說：「可能我緋聞太多，冇人敢埋身。又可能工作忙，少咗識朋友嘅機會，加上自己係公眾人物，做每件事都格外小心，自己建咗一道牆，同人交往都唔敢投放百份百信心。」

陳嘉桓身形高挑，樣子甜美，大受廣告商歡迎，但她指身形高挑亦帶來局限性：「始終選角上會有高度限制，我又唔覺自己特別高。台灣同內地經常合作，好多男仔都比我高，外形亦匹配。」提到未來的發展大計，她希望可作多方面嘗試，除了拍攝最擅長的動作及功夫電影外，亦希望拍攝喜劇或愛情片：「其實我都有興趣做主持、司儀。」

Rose希望過簡單生活，如果可以放下工作，騰出一年時間出走，她會選擇到澳洲：「我嚮往Working Holiday，今年21歲，希望30歲前有機會實現呢個夢想！我想去澳洲生活，嗰邊簡單樸素，空氣又好。我希望可以去牧羊，每日早睡早起，過規律嘅生活，遠離煩囂！」