前歌手蕭潤邦（Oscar）近年轉攻飲食界，為自我增值，早前再飛上海學廚，寓工作於娛樂的他往杭州西湖時遇上「呃錢黨」，並帶眾人買茶葉，幸醒目的他即叫司機折返上海！

早前往內地學藝的Oscar，帶同女友往上海及杭州遊玩，寓工作於娛樂。

Oscar（左）日前飛往上海一星期，在酒店內進修廚藝。

Oscar面對湖光山色，心情舒暢。

上海大閘蟹馳名，Oscar表示日日勁擦。

蕭潤邦（Oscar）日前飛往上海一星期，於酒店內進修廚藝，他說：「因為個總廚係前輩啲朋友，所以引薦我，呢啲機會好難得。（學足七日？）五日，有兩日去咗玩。」他透露帶同圈外女友同行：「之前去上海幾年都係工作，今次心態唔同，好似去旅行，仲帶埋女友、細佬同同事一齊去。」

Oscar自爆往杭州西湖時遇上「呃錢黨」：「好多人攞住啲相，話二百蚊就可以包車，我哋四個覺得好抵咪租咗，點知佢帶我哋去買嘢，都知唔對路，加上又唔熟路，即刻叫司機車番我哋去原地。」問到有否去西湖？Oscar說：「有，去到都日落，嘥晒啲時間，真係唔抵，好嬲。」Oscar坦言有不少上海朋友，不過當離開上海即被騙。

日日食大閘蟹

問到是否首次被呃？Oscar說：「唔係，我成日都被人氹，好似去泰國叫司機車我去食海鮮，點知車我去唐人街蒸條魚我食，要咗我五百幾蚊港紙。」上海大閘蟹馳名，Oscar表示日日擦：「係勁食，一個人食五、六隻，不過聽當地朋友講，好嘅蟹已經出晒口，但都好好食。」