無綫藝人羅鈞滿雖然於早前的歌唱節目《星夢傳奇》落敗，但卻賺到不少演出經驗和支持！不過近日他因發表一段網上言論而備受網友抨擊，成為眾矢之的！雖然阿滿恍如置身天堂與地獄，但仍無悔當初，昂首闊步度過每一天。

阿滿無悔在網上發表言論，但坦言對父母的擔心頗為內疚。

阿滿（中）參加由鄭裕玲、崔建邦主持的《星夢傳奇》時狀態大勇，可惜在五強一戰表現失準，慘被叮走。

阿滿希望演而優則唱，繼續在舞台發熱發亮。

羅鈞滿早前憑歌唱節目《星夢傳奇》彈出，更一度成為大熱，無奈在比賽期間，因排山倒海的工作令他體力不支影響狀態，最終慘被叮走，無緣進入總決賽，對此阿滿說：「當然有失望，但已經盡咗最大努力，因為嗰陣有好多工作，搞到體力平衡唔到，不過始終對於隻歌準備得唔夠！」

雖然阿滿輸掉比賽，不過他笑言在過程中賺到不少機會，這亦是他始料不及：「由入訓練班開始，一直都想演而優則唱，好似吳卓羲、黃宗澤咁，做到一定嘅位置後，可以去唱歌！但突然間有呢個比賽，可以令我喺公司節目入面單獨咁唱歌畀觀眾聽！但之後，《星夢》竟然可以令我有機會踏上紅館唱歌、去新加坡登台，真係超出我預期太多喇！」

否認博上位

不過，阿滿在歌唱上得到別人認同的同時，早前卻因在網上發表對王維基的言論而備受網民抨擊，可謂天堂與地獄的分別！不過他對於發表該言論並無後悔，只對父母有內疚之情：「一直以嚟都想父母開心，但依家佢哋好擔心，令我覺得以後每做一樣嘢，都要顧及父母嘅感受！」他又苦笑說：「當聽到一啲同我合作過嘅朋友，話我藉呢件事博上位，都令我幾唔開心！」