「星二代」影星徐偉棟的妹妹徐穎堃從加拿大返港發展，兩兄妹分享兒時回憶即滔滔不絕，她不諱言視偉棟為偶像，但最難忘的竟是哥哥以流利英語餵飽全家，令偉棟啼笑皆非。

徐偉棟與徐穎堃自小感情要好，妹妹更視他為偶像。

徐穎堃曾是溫哥華華裔小姐冠軍，並與支持她的哥哥合照。

徐穎堃提起哥哥小時候的「英雄救妹」事迹即一臉冧爆。

影星徐少強及雪梨之子徐偉棟（Edward）近年進軍影壇拍了多部電影，其妹徐穎堃（Erica）最近亦從加拿大返港，Erica是2011年溫哥華華裔小姐冠軍，翌年來港參選華姐，當時更被視為熱門。

Man爆「兇」走壞人

活潑開朗的Erica與Edward提起童年往事即笑不攏嘴，相差四年的二人小時候經常打交，Edward笑言是「打者愛也」，但他表示只是玩耍，內心非常關心妹妹，最擔心她亂識朋友：「每逢有男仔接近我哋屋企，或有男仔想約佢，我都好緊張會問清楚！（覺得呢個妹點？）佢好照顧我，會嘗試幫我解決問題，又成日幫我食死貓，冇得頂！」

Erica認為長兄為父，並視Edward為偶像，提起其「英雄救妹」事迹即一臉冧樣：「我細個好似一舊飯，無論哥哥點對我，我都好鍾意佢！我知佢好保護我。（最難忘邊次？）記得細個啱啱移民加拿大，我同親戚英文都唔叻，當時去快餐店唔識落單，全靠哥哥負責買晒所有嘢！」身旁的Edward顯得頗無奈，並笑說：「可唔可以講啲勁啲o架？」Erica即補充讀小學時被同學欺負，幸得Edward挺身而出「兇」走壞人，覺得哥哥Man爆！修讀犯罪心理學的Erica返港後兼職兒童教育工作，亦希望跟隨兄長步伐加入娛樂圈，不論台前幕後也有興趣，問到Edward會否給予意見？他即叮囑妹妹萬事小心：「演技方面未教住，反而係分享經驗同做人道理，唔好行差踏錯。」