羅仲謙於新劇與岑麗香（香香）演情侶，他笑指香香眼淚如開水喉，連一些毋須流淚的場面，也會被氣氛感染而不禁落淚，令他更易投入感情，不過這份愛只限於戲內，阿謙坦言現實生活中沒有過電，實行向正印女友楊怡大派定心丸！

羅仲謙笑言一定會給女友名分，未知楊怡聽到會否勁冧？

羅仲謙於新戲與香香演情侶，大鬥演技。

羅仲謙與楊怡傳拍攝《On Call》第一輯時撻着，但今次只有一、兩場對手戲。

羅仲謙於上輯《On Call 36小時》與華姐張慧雯有感情線，今次於《On Call 36小時II》則被安排與上位花旦岑麗香演情侶，面對演戲經驗尚淺的香香，阿謙反而感覺輕鬆，透露對方未有為角色設定太多，只隨心演繹，毫無保留把所有情緒投入，與其他經驗豐富的演員處理角色方法截然不同，故他每日與香香演對手戲都覺得很開心。

親密程度限拖手

對於這位新進對手，阿謙有讚冇彈：「原來佢都幾喊得，程度係唔需要喊都去喊，佢話做死屍同暈低都想喊，呢個係幫佢度身訂造角色，我都有畀壓力佢，話古仔寫得好，得唔得要睇自己，咁香香都話同我拍戲好開心，互相令大家投入真感情。（驚唔驚佢愛上你？）唔會，我好專業。」雖然合演情侶，但親熱程度只限於拖手，連阿謙也笑指與香香關係似神交，問到是否「女友」楊怡向監製施壓？阿謙笑住否認，表示只是貫徹監製一貫風格，還自爆結局香香離世一幕很淒美：「第一次Handle咁沉重嘅戲，上集只係追阿怡失敗，但角色都係樂天，今次面臨生離死別，估唔到喊得好勁，後來發展到淨係望住佢個道具墓碑都流眼淚。」

談到盛傳拍攝該劇與阿怡撻着，如今拍攝第二集是否感受更深？阿謙笑言雙方今次只有一、兩場對手戲，問到是否現實追到，故不用劇情交代？他說：「唔係啩！最開心係呢個角色令我贏第一個獎，Astro男配角。（同阿怡合作做情侶？）冇所謂，緋聞大家鍾意睇，但唔會去澄清係定唔係。（結婚先講？）一定會有明確名分畀人，每個女性都想要尊重。（想快啲？）以前話35歲之後先諗，依家覺得隨緣啦！」