鄭融近日忙於籌備下月舉行的演唱會，日前她特地抽空為個唱主題曲《Live Like 18》拍攝MV，阿融大晒身材，實行趁成功收身後作大解放。她又不避嫌邀請前男友莊冬昕操刀任MV導演：「呢首歌係佢作曲o架！知道要拍MV時，佢主動話做埋導演幫我拍，佢本身都好鍾意做導演。」

鄭融不避嫌邀請前男友莊冬昕為其個唱主題曲的MV執導。

一向有練舞的鄭融於MV中輕鬆做出一字馬，認真厲害！

阿融需於MV中做出一字馬，問到可有難度？她說：「可以接受啦！自己一向有練舞同做瑜伽，都算身手敏捷。」問到與前男友再合作可會尷尬？她說：「唔會，雖然做唔成情侶，但都可以做朋友。」又直言跟莊冬昕在音樂上有默契兼互相信任，對方同時擔任其演唱會的音樂總監。阿融又不怕現任男友到場支持，氣氛會尷尬，她說：「依家仲未知男友會唔會嚟捧場，就算兩個真係碰到都唔怕，大家好成熟唔會爭風呷醋。」