「鬼妹」陳明恩早前在歌唱比賽《星夢傳奇》勇奪季軍，唱功備受肯定！回想昔日，明恩在歌唱路途中曾一度迷失，更自覺唱歌難聽而失去信心，幸好最難過的日子經已過去，現時明恩懷着理想，繼續在舞台發光發亮。

陳明恩即將出碟，並希望透過自己的故事感動別人。

陳明恩（右起）在《星夢傳奇》中奪得第三名，與鄭世豪、鄭俊弘和姚兵合照！

陳明恩（中）在總決賽當日，父親（右一）和母親（右二）齊到場打氣！

陳明恩曾自覺唱歌難聽，信心一度崩潰。

陳明恩早前參加無綫歌唱節目《星夢傳奇》，憑着出色的表現，成功殺出重圍，進入決賽，最終勇奪第三名！問到未能摘冠會否感失望時，明恩搖搖頭說：「其實我冇諗過可以去到決賽，佢哋個個都好勁、好有才華！喺每集嘅比賽入面，因為唔知自己可唔可以留低，所以都好享受表演嘅過程！今次拎到第三名，已經超越我所想。」

曾憎恨唱歌

因為《星夢》，明恩在歌唱路上屢獲肯定，令她信心大增。不過回想以前，明恩也曾遇過人生低潮，更不時否定自己：「曾經因為搵唔到自己嘅唱歌風格，搞到好唔開心，當時直情憎唱歌，覺得自己唱得好難聽！第二次就喺兩年前，整晒所有歌諗住派台，點知間公司執笠。」

此外，明恩最近一圓歌手夢，更即將推出處女專輯，她說：「始終第一隻碟，都想分享一啲重要經歷，希望自己嘅故事可以鼓勵人，同埋希望粉絲可以支持我，買我隻碟啦！」