高海寧封胸約網友

高海寧（高Ling）及吳業坤昨日出席「3香港流動通訊服務《愛情公寓》」記者會，身穿低胸裙的高Ling露出深長事業線，她笑言活動介紹網上交友，自然要打扮得性感吸引異性。聲稱冇男友的她表示會考慮上網結識朋友，記者笑她如此好身材，必定大把男士與她約會，她即說：「到時我會封晒胸！」又自爆以前透過社交網絡ICQ交友，問到可有約出來見面？她說：「試過約一個朋友出街。（你好大膽？）我有帶自己朋友，佢又帶佢朋友，大家一齊去睇戲。（唔怕危險？）都驚，不過大家識咗好耐，佢係消防員。（有冇識到上房？）冇！」