向來Sweet爆燈的林峯與吳千語，日前下午4時許又戴情侶黑超到銅鑼灣拍拖。當日兩人撐枱腳後，到附近護膚品專門店閒逛，未幾便有斬獲。向來錫燶BB的林峯主動做阿四拿取戰利品，千語BB則手揈揈與男友並肩而行，期間有傾有講。不過，千語BB跟林峯耳語幾句後，兩人突然停低並對望數秒，林峯顯得不悅，大庭廣眾下「耍花槍」！兩人似乎雅興盡消，轉去停車場取車，發現有記者後即O晒嘴！當記者笑指兩人日日出街拍拖，怒氣未消的林峯笑着寸寸貢說：「又見到你哋嘅？你夠日日都食飯啦！（去邊嚟呀？）啱啱去行街，依家去攞車。」直至有女途人路經讚他靚仔，木無表情的林峯才笑番，然後搭升降機往停車場取車與BB離開。

「阿四」林峯被千語BB激親，被記者撞破即邊笑邊寸，之後急急鬆人。