泰國法科師傅搖身一變做歌手可謂噱頭十足！「香港首個泰國法科女師傅」陳譽之「轉戰」樂壇，為圓歌星夢，搣甩成熟打扮，以最真一面見觀眾。

出唱片做歌手，陳譽之並非為名利，只希望遇上知音人。

陳譽之（右二）曾在《怪談》中亮相，與主持梁思浩大談神怪事件。

為對自己有個交代，陳譽之正職做師傅，副職做歌手，一圓歌手夢。

憑「香港首個泰國法科女師傅」成名的陳譽之，一直有個歌手夢，學生時代已經密密參加校際歌唱比賽，又曾與不同唱片公司接觸，幾經波折，現終可一圓歌星夢，她說：「以前曾經有機會見唱片公司，不過佢哋要做組合，而唔係做Single歌手，自己又唔係Sell身材、唔賣性感，亦有人礙於自己師傅嘅身份而卻步，既然唔係自己想要嘅嘢，咁就算啦！慶幸依家唔再需要求人哋畀自己出碟，我有興趣，有自己嘅夢想，依家就算隻歌唔紅唔爆，都算係對自己都有個交代！」

陳譽之因被邀上靈異節目《怪談》而為人認識，就連遠至美國的Discovery Channel亦曾邀她出鏡作客。

回復青春真面目

雖然習慣面對鏡頭，不過今年只得26歲的陳譽之，卻「被要求」作成熟打扮，只好Young在骨子裏：「以前要配合節目建立一個Image，但其實我自己都覺厭！點解師傅一定要咁老，要着套西裝出嚟見人？要一個26歲嘅女仔扮36歲，其實係一個悲劇，依家我已經冇再掂過嗰個擺「制服」嘅衣櫃。」