「巨聲幫」何雁詩是一名愛狗之人，早前推出首隻派台歌紀念剛過身的愛犬，愛狗大過天的她自爆求偶對象最緊要愛錫動物，笑言將來更可能要狗唔要B！

工作忙碌的何雁詩，會爭取時間陪狗狗玩。

何雁詩帶其中兩隻愛犬見人，魔天使更是家中新成員。

有狗萬事足的何雁詩，搵男友都一定要鍾意狗仔。

歌手何雁詩（Stephanie）曾參加無綫第一屆《超級巨聲》，熱愛寵物的她一共養了四隻小狗，其中一隻魔天使是新成員，只有七個月大。Stephanie透露早前買的小狗被證實發狗瘟而最終不治：「我第一次感受到有人離開自己嗰種傷心，我成日都會諗佢究竟會唔會記得我對佢嘅好呢，依家呢隻魔天使係寵物店送番畀我作為賠償，所以我依家會更重視佢，放更多心機落去佢哋度。」

愛犬離家出走

雖然成為藝人後，Stephanie的生活更加忙碌，但她會盡量安排時間陪四隻愛犬，問到可有時間拍拖？她說：「所以我將來嘅男朋友都一定要鍾意狗仔。（會唔會只養寵物唔生B？）我會希望將來有更多嘅狗仔陪住自己囉！」可謂有狗萬事足！

講到與狗仔的一些難忘事，Stephanie大爆一件趣事：「之前我屋企有隻史納莎走咗出街都冇人知，咁啱爸爸揸緊車兜風，喺條街見到一隻狗佢覺得好似屋企嗰隻，於是佢對住隻狗響號，點知真係我哋隻狗，佢仲自己識上我爸爸架車。」