將家庭放在首位的李克勤，為應付下月的《左麟右李演唱會》，日夜加緊排練，知道要冷落家人一段日子，克勤特地抽空一家四口旅遊，6歲的立仁盡顯哥哥風範照顧弟弟。

忙於與校長（左）籌備演唱會的克勤特地抽空陪家人旅行，果然係好男人！

準備與太太Emily上機的克勤大方任影。

雖然立仁（右）只有6歲，但仍相當照顧細佬力司，叻仔！

克勤（前排右二）甫返港即忙於排舞，果然「勤」力！

李克勤跟譚詠麟（校長）正積極為下月舉行的《歐洲坊鐘錶與溥儀眼鏡聯合呈獻左麟右李十週年演唱會》排練，出名「廿四孝老竇」的克勤，早前特別抽出幾日假期，偕同太太盧淑儀（Emily）及寶貝仔立仁、力司一家四口出埠旅遊，當日清晨七時許，克勤一家在香港機場離境大堂內出現，6歲大的立仁自己孭住藍色小背囊，一直跟住爸爸身邊排隊，而Emily則負責照顧細仔力司。

兩兄弟立仁與力司跟媽咪Emily猶如餅印，克勤說過大仔愛看書，性格文靜，當日見他一直手挽住啡色毛公仔上機，非常可愛，細佬則比較好動，當日亦不時行來行去，兩兄弟有講有笑，當細佬行遠了，立仁即上前照顧弟弟，甚具大哥哥風範。他們同行還有一個小女孩，見克勤夫婦亦對她照顧有加。

與校長排舞

結束短短幾日家庭旅行，克勤要暫且放下家人，返港後馬上再次投入演唱會綵排工作，雖然跳舞非克勤強項，但連日來克勤跟校長忙為演唱會主題曲《跳啦！河馬！》排舞，見克勤跳得有板有眼，腿也踢得高高。一邊忙為個唱排練，一邊又要宣傳新碟，忙得連見家人都沒時間。