35歲的張美妮告別「盛女」行列，昨日下嫁髮型屋老闆黃偉強，註冊時哭成淚人的她更挑戰人體極限，揚言生B不設上限。

張美妮與黃偉強昨日舉行婚禮，情到濃時，二人更忍不住錫錫。

無綫藝人張美妮昨日與髮型屋老闆黃偉強舉行婚禮，請來星級姊妹團包括楊怡、楊思琦及楊卓娜等撐場，而羅仲謙、馬德鐘、田蕊妮、陳煒、洪天明、黎耀祥、陳雅倫、陳敏之、吳家樂、黃日華及呂慧儀夫婦等亦有出席，而李思捷及陳雅倫亦有同場，但同是第十三期訓練班的林峯則未有出現。

楊怡搏命搶花球

穿上性感婚紗兼大晒3吋事業線的張美妮，在註冊時差點哭成淚人，幸好有細心的老公事先準備紙巾，問到會否努力「造人」，她說：「會呀，我哋兩個都鍾意小朋友。（生幾多個先？）最少兩個，但冇上限！」而做姊妹的楊怡見到好友出嫁即表示很開心，更透露每人收到4位數的開門利是，問到有否羨慕新娘子，她說：「隨緣啦！（等男方表示？）我咩都聽唔到，但會努力搶花球！」她又表示日前因感冒才缺席台慶，但仍有睇電視支持。

至於陳雅倫則表示折現當送禮：「我哋講心唔講金。（叫新郎介紹男仔？）我同佢啲朋友太熟啦！最筍嗰個都畀張美妮搶咗啦！」曾傳出有「黑指甲小三」的呂慧儀與老公一同出席，問到與老公幾時和好，她說：「邊有分開過！（搽咩指甲油呀？）透明嘅，祝佢哋三年抱兩啦！」此外，楊思琦日前被指與「巨聲幫」的陳康健撻着，她希望大家不要相信傳聞。