Baby醉姣攻陷G-Dragon

內地型男黃曉明近日密密做搵銀，於上海為新戲開工，又到廣州出席汽車活動，但女友Angelababy竟趁「小明上廣州」即「作反」，繼去年12月於在港舉行的《MAMA音樂頒獎禮》慶功中黐實韓國當紅組合Big Bang隊長G-Dragon（GD）兼「抄牌」後，相隔近一年，前晚再度出擊冧GD，與對方在北京飲酒狂歡。

早前來港出席品牌周年派對的GD行程緊密，在港逗留不久便轉飛內地，前晚到北京舉行的《青春的選擇2013年度盛典》領取「最受歡迎海外明星大獎」。身為超級粉絲的Baby當然捧場，但她於台下欣賞完偶像勁歌熱舞後似意猶未盡，索性跟隨大隊直落慶功，實行向GD打埋身戰！一行人前往內地女歌手那英開設的Vics酒吧，並於VIP房內繼續狂歡，現場還有房祖名及柯震東等名人。有網友目擊戰況，未有男友曉明監場的Baby滿場飛，玩得相當投入，跟場內人士把酒聊天，不消一會已幾杯落肚。

坐頭排捧場High爆

雖然GD大受歡迎，場內不少人搶住「集郵」，但Baby早已有備而來，全程Mark實對方，還借醉出招姣溝！Baby「借啲意」行到GD身旁與對方密密傾，期間頻頻「放電」，不久兩人更拿起酒杯「隊酒」，碰杯後即大啖落肚飲清光，幾杯落肚後GD要返梳化休息「回氣」。由於GD需趕來港出席今日舉行的《MAMA》，眾人玩到約凌晨二時便離開。

其實當晚頒獎禮中，Baby看到GD表演時已經心情High爆，坐頭排愈睇愈興奮，其後索性企起身又唱又跳，睇得相當投入。當鏡頭轉向Baby時，她即尷尬傻笑，還做出「口殊」的手勢，似乎事前未有將北京會GD一事向男友曉明備案！