無綫為慶祝46周年大日子絞盡腦汁，獎品方面更加碼至逾千萬元，除名車、洋房及首飾外，亦會送出1千股股份、一噸汽油及一個價值50萬元製作費的音樂MV，胡杏兒稱邊樣貴揀邊樣，一眾藝人亦為爭獎品而瘋狂！

在芸芸獎品中，杏兒對價值近百萬元的內地洋房最感興趣。

想做「油王」的馬明亦睇中身後的名車，相當貪心！

張秀文代表杏兒一方抽中1萬元簽帳額，皆大歡喜！

陳展鵬（左）與蕭正楠一致想做無綫股東，不知最終誰能如願呢？

明晚舉行的《萬千星輝賀台慶》除了全台藝人大晒冷、傾巢而出表演慶祝無綫生日外，今年無綫更隆重其事，把獎品環節加碼至逾千萬港元，名車、內地洋房、鑽石首飾及名錶等樣樣齊，還加送不少貼身又貼心的獎品，包括1,000股電視廣播股份、一噸汽油及一個價值50萬元製作費的音樂MV等，讓藝員一圓歌手夢。

馬明恨換新車

今年的台慶獎品相當特別及豐富，《巨輪》兄弟陳展鵬與蕭正楠（Edwin）昨日接受電話訪問時特別興奮，欲當股東的Edwin說：「我對1,000股股份有興趣，行入公司個頭都抬高啲啦！」展鵬則說：「一直有研究開股票，無綫股有升值潛力，所以抽中都唔錯，如果公司平賣股份畀我哋仲好，令大家團結好多，對公司都了解多啲！」而杏兒貪心地說：「梗係邊樣貴揀邊樣啦！應該抽洋房好啲，因為我內地未有物業嘛。」馬國明則希望抽中汽油，反而對當無綫股東沒甚信心。至於參與《星夢傳奇》落敗的何傲兒表示夢想有自己的MV，若抽中會建議拉大隊到韓國拍MV。

此外，杏兒、馬明、展鵬及Edwin等昨日出席台慶獎品大晒冷活動，期間杏兒與馬明任代表玩拉枱布遊戲，結果杏兒一方勝出，並由港姐張秀文抽中1萬元簽帳額，而馬明拉枱布期間不慎把鐵叉飛到用作獎品的名貴房車，車身因而有少許刮花，工作人員即緊張上前查看。馬明於玩遊戲前透露對價值30多萬的名車心動：「咩都想抽，架車5年冇換，層樓就20幾年冇換，但我不嬲冇咩抽獎運！」