無綫早前吸納星煥國際另成立星夢娛樂，由於謝安琪（Kay）的經理人夏森美不肯「賣女」，令Kay再次成為「出唱孤兒」！不過，昨日Kay自爆有可能「夫唱婦隨」，考慮跟隨老公張繼聰効力金牌大風，更趁機隔空向金牌賣口乖！

謝安琪短裙現身，晒玉腿兼玉臂！

有大批粉絲捧場，謝安琪舉起勝利V字手勢。

謝安琪搞簽唱會，老嫩通殺！

謝安琪（Kay）昨日為國語專輯舉行簽唱會，獲大批粉絲撐場，她以一身紅色連身裙示人，大晒長腿之餘，心口又有個開胸神秘三角，大玩「三角誘惑」！她獻唱之餘又跟一班「Kay迷」大玩遊戲預祝聖誕。

Kay透露今次是首次在港為國語碟宣傳，慶幸未搞簽唱會前唱片已經有很好的成績，問到不會過檔星夢娛樂的她何時再出廣東碟？她向歌迷大派定心丸：「依家忙住同金牌宣傳隻國語碟，雖然好忙，但係廣東碟都會製作，冇停過。」又稱出廣東碟「其實唔難」，現時只是遇到小問題，總有方法發行廣東碟。

力撐台慶收視

至於會否「嫁雞隨雞」跟老公張繼聰入金牌大風出廣東碟？Kay勁識做地說：「金牌係一間好好嘅公司，當然會係考慮嘅首選之一。（依家有冇唱片公司向你招手？）呢個就要問吓我經理人啦！」

另外，提到無綫台慶將會有大型抽獎環節，有車又有鑽石，屆時有份表演的Kay大讚有心思，相信會是當晚的一個小高潮！她又自爆有抽獎運，以往玩大抽獎都有「斬獲」，又謂作為當晚表演一分子，好希望節目反應好，所以對於收視不會作太多猜測。