剛踏入30歲的鄧麗欣（Stephy），在圈中浸淫了十年，加入娛樂圈令她的生命起了極大變化，人生觀有很大得着，最怕被框住的她，從未為自己規劃過人生，因為她的性格使然，深信只要一直向前走，即使要摸黑她也不害怕，相信前面總會有路可行。

Stephy表示沒有規劃過自己的人生，因為最怕做人被框住。

雖然與方力申拍拖多年感情穩定，但Stephy仍擔心「七年之癢」。

性格硬淨的Stephy，原來亦有脆弱的一面。

Stephy慨嘆愈大愈細膽，不敢玩刺激玩意。

鄧麗欣坦言不介意別人知道自己歲數，在26、27歲時曾經很怕30歲的來臨，她笑說：「因為聽好多人講30歲會點會點，係有一種外來壓力，不過到咗30歲，感覺反而愈來愈淡，啲日子咪一樣咁過，其實冇咩大變化。」她覺得自己心境依然是廿多歲，每當聽到別人讚她外表不似30歲，她都會很開心，還令她增添自信。

Stephy承認過去這些年她的生命裏有很大變化，性格內斂的她，從沒想過在娛樂圈工作，未入行前以為生活屬於很平淡，並以姐姐為目標：「佢係一個安於現狀，有一份穩定工作，有個好家庭，又生咗小朋友，我覺得穩定嘅生活好舒服、好開心，我細個要上台講句嘢都驚，冇諗過有機會走入娛樂圈呢個色彩繽紛世界，真係我人生極大轉捩點。」

食得鹹魚抵得渴

轉眼間，Stephy已入行十一個年頭，她覺得最大得着就是人生觀，以前的她比較悲觀，但這行帶給她很多快樂，雖然作為公眾人物壓力很大，但她覺得是相對的，她說：「既然我得到咁多，承受番少少壓力係應該嘅！」還笑言大家看她好像很淡定，性格也硬淨，其實卻有脆弱一面：「我都有壓力，但識得搵個方法去調節，覺得我個EQ還可以。」

她沒有規劃過自己的人生，因為最怕做人被框住，她曾看過一本書，對書中有段說話印象深刻，意思大概指「當你揸住車走在黑暗的道路，車頭燈照射只會畀你睇到前面十米的路，但只要一路向前駛，條路一直都喺度。」其實人生就是這樣，毋須想得太遠，尤其是娛樂圈很多變化，想得多反而會打亂自己，她說：「總之向前行，行到去自然會知點行，諗太多都冇用。」

拗撬難免

愛情路上，Stephy與男友方力申拍拖多年，感情穩定，她說：「你拍拖唔會諗下個月就分手，當然係想關係長久，但感情嘢更加冇得預計，唔可以諗太多，到咗覺得要變時先算。」今年正值是兩人拍拖第七年，她笑言也擔心「七年之癢」，因為拍拖多年大家已變得好平淡，她笑說：「雖然我哋間中都有啲驚喜，但現實就係咁，依家大家生日或者節日都懶得諗送咩禮物，因為好多禮物都送過晒，七年之癢都驚㗎！但驚都冇用。」Stephy自爆跟小方為討論一些無聊事而拗到火紅火綠，因為兩人都是「道理王」，經常各持己見，她笑說：「一齊咁多年點會冇嗌交，有時拗完都唔明點解要拗，但我覺得拗吓都係好事，如果唔嗌交、又唔送禮，拍拖都唔知做咩，試問有幾多對情侶可以熱情如火到尾？」

拒絕引誘

娛樂圈被認為是一個充滿誘惑的地方，但Stephy認為視乎每個人性格：「好多人話呢行會令一個人改變，我覺得睇你自己，你點諗就會吸引咩人，如果你唔係咁諗，所謂嘅引誘都唔會埋你身，我暫時感覺唔到有咩引誘，可能我性格冇咩變，兩個人一齊要有信任，我對小方係信任嘅。」

後記：遺憾冇玩笨豬跳

30歲的Stephy，被問到有甚麼沒做過而覺得後悔或遺憾的事？她笑說：「之前我一直好想試吓玩跳降傘、笨豬跳呢啲刺激玩意，依家真係有啲後悔，因為人愈大唔知點解愈細膽，所以大家趁後生要快啲去玩，30歲後要修心養性。」