近年娛樂圈興起一股健美風，不少藝人均操得一副好身形，孖女組合AOA和師兄鄒文正亦「肌」不可失，相約做Gym誓做樂壇「健」兒！舞功高強的AOA渴望練得一身結實肌肉，與偶像美國天后Beyonce睇齊！

AOA健美跳舞樣樣掂，企住劈腿Easy Job啦！

一對孖女在健身球上金雞獨立，大考臂力和平衡力！

AOA和Terry（後排左一）跟教練先做熱身，以免操肌時拉傷。

Terry玩重量級訓練，谷到青筋暴現，即刻由宅男變身肌肉人！

Terry舉啞鈴大騷一雙麒麟臂，Man爆！

Step1
雙手彎曲把重物捧於胸前，重物需和膊頭保持直線，左腳踏前以箭步跪低。

Step2
前後腳站立，雙手維持不動，重物依然和膊頭保持直線。

Step3
將拿着重物的雙手向前伸直。

Step4
雙手和腰向左轉（轉左時左腳在前，轉右則右腳在前）。
重複以上動作15到20次，再轉另一邊，為1 Set，總共做4 Set。這套動作可以訓練大腿、臀部肌肉及腰部。

教練（上）指導Terry舉槓鈴的正確姿勢。

AOA擁有美好身段，原來背後付出不少！

歌手鄒文正（Terry）和AOA感情要好，除了是同門師兄妹外，閒時亦會交流運動經。最近娛樂圈吹起健美風，一眾型男索女紛紛做運動Keep Fit，Terry和AOA亦不甘後人，相約到Gym房練大隻，更獲健身教練「指點迷津」，誓要操出完美身段！

工欲善其事，必先利其器，Gym前當然要做足準備！穿一身標準運動裝的AOA露出小蠻腰及長腿，而Terry亦不甘示弱，大騷麒麟臂，認真睇得又操得！正式上陣前，三人在教練的帶領下，先做一連串的熱身運動。熱身過後，身為師兄的Terry率先上陣，進行重量級訓練，包括舉啞鈴和躺臥舉槓鈴等，出盡全力的他頓時魔鬼筋肉人上身，谷到青筋暴現，Man爆！而師妹AOA則主攻輕量級訓練，對有舞功底子的她們來說可謂游刃有餘，更邊做邊擺出不同甫士，十分輕鬆。

AOA自爆以前很抗拒做運動，但為了身體線條更靚，不得不走入Gym房健美：「我哋想身形Firm啲，多啲線條，希望以最靚形象見人。之前揀跳舞係驚做運動，覺得跳舞最輕鬆，依家做Gym就希望做針對腰同腳部嘅運動，我哋同教練傾過，唔使練到太大隻，Firm啲就得。」身為美國跳唱天后Beyonce的粉絲，她們希望可以似偶像的舞蹈般充滿力量：「我哋好鍾意Beyonce，佢跳舞好有力，大髀好Firm，做Gym配合跳舞都幾好睇！」問到可會揀大隻仔做男友？貪心的她們笑言希望男友可以文武雙全：「我哋鍾意大隻得嚟帶點斯文嘅男仔，如果個男仔有文學氣質又好鍾意做運動就最好啦！不過最緊要佢個人健康，有陽光感覺。」

鄒文正宅男大隻夢

而身為音樂人的Terry則自嘲是宅男一名，長期都留在家中創作音樂，他表示這次是為了擺脫宅男形象而下定決心健身：「我係宅男，成日坐喺屋企彈琴，做運動會健康啲。（大隻佬同音樂人形象唔夾？）我哋呢啲Band友應該剛柔並重。」對於不少男星迷上健身，問到可擔心被指跟風？他說：「唔怕，依家未有效果，主要想調理好身體。其實我都想練條人魚線，不過依家仲係似一條車呔。」

完美身形四部曲

想有完美身形卻沒有時間做Gym？只需要準備重約2至3kg的物品（注滿的水樽或其他重物），在家亦可以做一些輕量運動保持線條美！

後記台下十年功

鏡頭前藝人練得一身好肌肉，外表風光但背後其實需要極大恒心！AOA和鄒文正雖然不是首次做Gym，但做完整Set訓練後都大汗淋漓，氣喘如牛。要維持一身肌肉，除了定期做運動外，還要保持飲食健康，戒油戒甜，對食無定時的藝人來說是極大挑戰，所以藝人完美身材的背後，可謂有血有淚！