李思捷緋聞女友馮鎵瀠（Naomi），言行和衣着都非常大膽，甚至推出過超性感寫真集，但她亦有可愛的一面，坦言是卡通公仔Carebear狂迷的她，家中有無數Carebear產品，有一部分更是由追求者所贈，反而歷任男友未送過，難怪Naomi暗示男友唔識貨！

穿上毛毛連身褸的Naomi興奮地說：「呢件褸成件着落身可以變做Carebear！我試過萬聖節着住去蘭桂坊，因為Carebear喺美國好紅，喺蘭桂坊有好多外國人見到我，係咁叫我影相，最鍾意呢個Product，因為香港冇，好難搵，我要訂番嚟，但唔算好貴，600至700蚊左右。我唔捨得成日着o架，唔係大時大節我都唔着。」

外表圓碌碌、一身Baby Color的Carebear，是不少女生最愛的卡通公仔，連Naomi亦是頭號粉絲，童心未泯的她說：「細個時睇過Carebear卡通片就鍾意咗佢，但媽咪唔識買佢嘅產品畀我，買咗假嘅仿冒品，到我大個咗，08年喺日本出番佢嘅復刻版公仔，雜誌又好Hit咁介紹，我知有得賣，當時有朋友喺日本讀書，就託佢不停幫我寄返香港。其實喺台灣有好多人鍾意呢隻公仔，我去到台灣發展後就開始儲。」Naomi還自爆最瘋狂試過到台灣的Carebear主題餐廳，等足三個鐘，就是為了吃個Carebear餐。

多到擺迷你倉

Naomi又如數家珍地說明每隻Carebear的來歷：「第一隻自己買嘅Carebear識唱歌，第二隻係以前經理人公司嘅歌手送畀我，佢喺日本帶番嚟。原來台灣仲有專門店，我嗰時差唔多每兩個星期就去一次，每次點都要買一兩樣嘢先走。（屋企好多地方擺？）當時喺台灣自己住OK，返香港寄咗12箱Carebear返屋企，香港地方淺窄，依家同屋企人住，加上屋企人唔鍾意呢啲小朋友嘢，所以依家擺喺迷你倉。」

呻男友唔識做

至於有沒有追求者送Carebear博她歡心？Naomi說：「曾經有個台灣男仔，佢送咗好多Carebear產品畀我，有背囊、銀包、大毛公仔、筆同毛巾等，一個禮拜寄一隻嚟，但我對佢冇心動，佢對我好好，但佢唔係我嗰Type，佢冇才華，我拒絕咗佢之後先冇再送，佢追咗我9個月。但就冇男朋友送過畀我，全部男人都覺得鍾意Carebear好幼稚o架！」Naomi說時仍一臉怒氣，擺明嬲男友唔識做！

陪住拍MV

Naomi的這個咕o臣原來曾「上鏡」，她說：「好鍾意呢個大咕o臣，係我喺百貨公司買，佢陪我拍第一個MV，亦係人生最後一個，佢有入鏡客串。首歌叫《互相關注》，內容講網上戀愛。」

公仔衫賣萌

除了收藏公仔，Naomi連衣服也不放過：「呢件印有Carebear嘅T Shirt，我到依家仲着緊，我覺得好靚好得意，着住去街不知幾開心。」

讚錦榮識貨

Naomi回想起某次出席活動的經歷：「我以前嘅經理人話Carebear係豬，唔識貨！點知有次拎呢個袋出Event見到錦榮（蔡依林男友），佢見到即刻話：『Carebear？So Cute！』我好開心，終於有男仔識貨，簡直係知音人！我最近去台灣一路行街都拎住，啲男仔望住我個袋，覺得點解我會用？但女仔回頭率都好高，試過有女途人問我喺邊度買。」