謝婷婷昨日出席活動，提到下月是她與安志杰分手後的首個聖誕節，她自言沒有特別感觸，現時亦沒有追求者，故聖誕會與朋友開派對慶祝，亦會買禮物給兩名姪仔，但未知可會在聖誕佳節見到他們！

婷婷即將過分手後首個單身聖誕，但她笑言不愁寂寞。

準爸爸陳豪出席活動時心情大靚。

謝婷婷與陳豪昨日齊齊主持《體驗夢工場冬日冰之巡禮》啟動儀式，婷婷提到即將過分手後首個單身聖誕，她坦言沒有特別感觸，因為聖誕節是她最愛的節日，並已計劃與朋友開派對：「同朋友煮吓嘢食。（呢個係冇男友嘅聖誕？）有屋企人同朋友都OK。（有冇追求者？）冇，都係工作先，順其自然。」

陳豪陪入產房

至於有傳她的前嫂嫂張栢芝有新歡，她面有難色地說：「唔清楚。（有冇同佢聯絡傾偈？）佢喺第二度返嚟，我都係。（幾耐冇聯絡？）唔係太清楚，佢嘅嘢可唔可以唔答？（買聖誕禮物畀兩個姪仔？）會呀！（買咗都送唔到畀佢哋？）唔緊要，都係有個意思。（聖誕節見佢哋？）唔知，都會掛住，佢哋咁得意。（栢芝有新歡你會唔會祝福佢？）都會，無論係邊個我都會祝福，因為係好事。」

而準爸爸陳豪的太太陳茵媺懷有B仔，但在台上卻獲贈粉紅色的BB衫，寓意他追多個女，他說：「我個係B仔，但送B女衫，爭少少啫！開心嘅，好多朋友送BB用品畀我，慳番唔少，亦令我對小朋友認識更多。（練習定換尿片？）未呀！冇去上堂，但有上網搵資料。（驚唔驚到時照顧BB會手忙腳亂？）怕o架！啱啱生完會幾緊張，兩邊（媽咪和BB）都唔可以分散注意力。（BB係最好嘅聖誕禮物？）係咁大個仔最好嘅禮物！（錫個仔多過老婆？）我會注意呢樣，好多人會將注意力放落BB度，令媽咪倍感寂寞。」他又表示BB出世頭一兩個月，會減少工作。問到BB是否在聖誕節出世？他笑言讓BB自己選擇，而他亦會入產房剪臍帶。提到太太順產可能會很痛苦，他表示這是過程，是女人值得炫耀的經歷。另外，前晚舉行的無綫節目巡禮中，憑《星夢傳奇》彈起的鄭俊弘深受客戶歡迎，陳豪亦大讚他：「佢幾好，好有才華。」