祖兒壓力爆煲焗甩底
《2013年度叱咤樂壇流行榜頒獎典禮》昨日率先舉行記者會，但大部分一線歌手及常客包括容祖兒、陳奕迅及Twins等冇影，場面較過往冷清。原本答應出席的祖兒據知因忙於準備個唱壓力太大，患上「演唱會症候群」而被迫缺席。
容祖兒
記者會人多勢眾，但冇乜巨星壓場，張敬軒（上圖左起）、梁漢文及王菀之都安排企頭排靚位。
（設計對白）
臨近年底，四台樂壇頒獎禮將相繼舉行向歌手派發成績表，《2013年度叱咤樂壇流行榜頒獎典禮》於明年1月1日舉行，昨日率先舉行記者會，雖然有不少歌手到場，但部分一線歌手兼叱咤常客包括容祖兒、陳奕迅（Eason）、楊千嬅、Twins及何韻詩卻未見蹤影，而與叱咤不咬弦的鄧紫棋（G.E.M.）同樣缺席，場面冷清，相比去年記者會顯見失色。
「不和」G.E.M.不獲邀請
叱咤得獎常客千嬅因身在紐約出席《第四屆紐約電影節之中國之夜》，與剛完成個唱正在放假去旅行的阿詩齊齊缺席。而大會發言人則表示Eason昨晚在泰國舉行巡迴個唱未能現身，Twins早已講明不在香港。不過，大會指祖兒原本答應出席，惟最後未有現身，還着記者向其唱片公司英皇查詢。據知，祖兒因忙為下月舉行的演唱會閉關操練，其經理人Mani在電話中承認原本答應出席，但因祖兒壓力太大患上「演唱會症候群」而忍痛缺席︰「因為祖兒大壓力，希望專心為演唱會，我哋會尊重祖兒決定，開騷前盡量唔出席任何公開活動，除非一早接咗，以免順得哥情失嫂意。」但她透露頒獎禮當日祖兒會現身︰「希望電台體諒！已經向佢哋解釋頒獎禮會去，嗰日仲特登提早開騷，完騷後趕去頒獎禮。」而祖兒昨日在Instagram上載晒肌照，可見她全力綵排演唱會。
對於大會發言人表示G.E.M.因冇歌上榜而不獲邀出席記者會，G.E.M.經理人在電話中表示G.E.M.的派台歌有在其他電台上榜，唯獨在叱咤冇份︰「我哋派咗3首歌，其中《你把我灌醉》有上其他流行榜冠軍。（同電台不咬弦而未有上榜？）相信有少少關係！」問到會否尋求破冰？其經理人稱一切順其自然︰「梗係希望啲歌個個台都有得播，可惜事與願違，冇上榜歌，出席頒獎禮機會比較細。」
張敬軒承認氣氛悶
提到記者會場面冷清，出席的張敬軒承認今年樂壇氣氛悶︰「上一批歌手都去走埠，我呢啲係新人中嘅小小前輩，雖然今年冇信心得獎，但都要嚟支持。」對獎項打定輸數的他還表示會去頒獎禮︰「諗住得唔到獎，但會着靚啲去，輸人唔輸陣，有得參與頒獎禮證明我仲喺呢行。」而王菀之認為氣氛比去年遜色︰「雖然有啲哥哥姐姐唔喺度，冇去年咁好，但見到香港有好多新一輩歌手。」對於早前本報率先披露她奪女歌手銀獎，她說︰「有人預測自己都開心，證明有人支持，但信心唔夠膽講有。」
