鍾楚紅（紅姑）昨日主持韓國護膚品牌新店開幕的剪綵儀式，她表示十分欣賞電影《原罪犯》的韓國導演朴贊郁，問到若對方邀請拍戲會否復出？她笑說：「話唔定，佢嘅劇本好好！（佢嘅故事好暴力！）可能佢搵我飾演變態婆或者畀人斬開幾件嘅角色。（你接受到？）好難講，睇我當時情況，可能我嗰排癲癲哋想接，但呢排想平和啲！」

置身兩名韓籍男模之間的紅姑零舍風騷。

同場有兩名韓籍男模，紅姑大讚韓國男士靚仔及身形好，問到喜歡港男還是韓男時？她說：「講靚，韓國男仔整體靚啲，但男仔除咗外表，內涵都好重要。（韓國男人好大男人？）係，好惡！好耐以前去韓國拍戲，覺得佢哋唔係太睇得起女性，行路橫衝直撞唔避人，冇男士風度，要女士避佢，所以我鬥氣同佢哋鬥撞。」