「亞洲舞王」郭富城（城城）將於下月在深圳擺設「舞臨盛宴」，唱而優則演的他雖然要兼顧開騷和拍戲，但多年來一直堅持刻苦操練，已成功把「人魚線」當衫着般長期Keep住，讓歌迷大飽眼福！

城城一出場即跳番幾下勁舞，未有騷睇都有得止吓癮先！

副靚偈Keep足咁多年，城城坦言都唔易o架！

主辦單位和贊助商送上城城的肖像Figure，頗有心思。

城城舉杯預祝演唱會大賣兼順利完成。

舞台王者郭富城將於下月7日在深圳舉行《舞臨盛宴郭富城世界巡迴中國演唱會》，昨日城城專程到深圳舉行記者會，戴黑超的他一出場即大騷迷人舞步，並獲主辦單位和贊助商送上以其演唱會造型設計的肖像公仔，以及一隻水晶馬，寓意城城的演唱會和地位可以繼續一馬當先！

有別於之前紅館的四面台，城城透露今次會採用三面台設計，故舞步要重新編排，亦會有全新的歌衫，問到可要再操「人魚線」？身材Fit爆的他得戚地說：「人魚線不嬲有Keep住，好奇怪，好似着住件衫咁，但可以練得再深啲！」但他之後謙稱其實操練時間很漫長，飲食又要檢點，反而拍戲時可以放鬆一下。

密謀拍新片

城城又謂近日除了忙於籌備演唱會外，亦開始睇劇本，他早前特意欣賞新進導演翁子光的作品，正計劃明年與對方合作，如果劇本有水準和認真，不介意減片酬接拍低成本的製作，問到可會投資電影？他說：「投資我唔識，我自己寫咗啲劇本都冇諗住投資，或者搵啲有錢使唔晒嘅人投資。」雖然開騷拍戲賺到盆滿缽滿，但近日考獲船牌的他坦言仍未有計劃買私家船。提到好友楊采妮與邱韶智在新加坡拉埋天窗，雖然城城未能出席，但已向一對新人送上禮物，又祝他們開心幸福。

另外，AEG網上售票系統於今日正式啟動，以城城的世界巡唱深圳站作為頭炮，還會提供其他天王天后內地騷的門票。