霍震霆兒子霍啟剛昨日出席《新世界單車慈善錦標賽》，他表示已為出生不久的BB改了中英文名，但暫時未能透露，又指父親要開會為乖孫改名！啟剛又大讚BB雙腳有力，遺傳了母親的運動細胞，將來大有機會做運動員！

霍啟剛笑言早晨四、五點會自動波起身睇BB。

三太（中）自爆曾與賭王在東京踩單車。

沈卓盈透露曾偷家姐的單車玩，險些整斷腳。

霍啟剛及賭王何鴻燊三太陳婉珍昨日到沙田為單車比賽擔任嘉賓，TVB藝員沈卓盈（Jess)、港男翟威廉及溫家偉則參加賽事。啟剛表示與太太郭晶晶所生的兒子已改名，但暫時未能透露：「登記咗先講，中文名就爹哋（霍震霆）改，佢開晒會攞晒字典出嚟，英文名就係我改，但留番一齊宣布啦！」他表示每逢早晨四、五點會自動波起身睇BB。問到晶晶暫時是否專心湊仔？他說：「係呀！餵人奶嘛！都未知幾時戒夜奶，BB雙腳好有力，遺傳咗母親嘅運動天分，可以第時學跳水，不過都要學識游水先。」三太則表示以往曾與賭王在東京踩單車，認真浪漫！談到賭王月底生日，三太表示已準備禮物，屆時會一家人食飯，提到超雲被拍到有新歡，三太說：「冇，係你哋講啫！隨緣啦！」

沈卓盈險斷腳

至於沈卓盈則表示兒時曾偷家姐的單車玩，結果險整斷腳，幸而沒有留下陰影。對於被拍到與男友拍拖及有指她向對方催婚，她說：「咁我哋都公開咗，出街少不免。（恨嫁？）唔心急，不過女仔都嚮往結婚。（男友求婚？）未，但係有講過，佢叫我乜都唔使諗。（閃婚？）佢諗啦！」