台慶頒獎禮臨近，今年有機會提名「飛躍進步女藝人」獎項的朱晨麗昨日現身馬場，為「莎莎婦女銀袋日」擔任模特兒嘉賓，穿上Tube Dress露事業線亮相，難道率先向馬迷拉票？問到為TVB月曆大晒高難度舞功，她透露當初只是擺靚靚甫士，但監場的高層樂易玲竟叫她踢腿：「踢咗好多下！配合埋專業攝影師合作，出嚟效果幾好。（網民話你條裙違反地心吸力！）影嗰下只係一秒，為咗有美感，其實條裙係黐咗膠紙！」

朱晨麗性感襲馬場，自爆影月曆時「出術」。

提到得獎機會，朱晨麗其後再受訪時說：「今年係有三套劇出街，但唔知會唔會有機會提名，自己冇攞過獎，邊有咁快！做好自己先，有提名都會好開心，而今年又咁多新面孔，好似黃翠如咁，我覺得佢先係大熱！」