梁嘉琪黐鬚挑戰底線

無綫藝員梁嘉琪、黃心穎、李佳芯（Ali）及麥美恩最近主持資訊節目《學是學非》，大玩Cosplay及趣劇，深得觀眾讚賞，嘉琪自言盡情「扮嘢」挑戰形象底線，問到最難忘的造型，她笑指有集反串黐鬚，扮演張國榮的西毒歐陽鋒：「行過直情冇人認得我，雖然以前扮過男人，但都冇呢次咁Man，眼神勁滄桑！」當日美恩扮演東邪，而Ali則首次化身古代俠女耍劍，她表示甚有難度：「都幾過癮，但現場有爽身粉營造飄雪效果，仲要對住吹風機唔眨眼。」另一集中，嘉琪及Ali扮演學生妹，重拾少女情懷，但自嘲似援交少女。